नवलपुर । हत्या पश्चात् लुटपाट गरी फरार रहेका एक अभियुक्तलाई प्रहरीले पक्राउ गरेको छ । जिल्ला प्रहरी कार्यालय नवलपरासी ९बर्दघाट–सुस्ता पूर्व० का अनुसार ०८२ चैत २३ गते देवचुली नगरपालिका–१६, टाँडीकोट टोलका ७५ वर्षीय जिउराम थनेत र उनकी श्रीमती ७१ वर्षीया गुलबसिया थनेतमाथि घरमै आक्रमण गरी लुटपाट गरिएको घटनामा संलग्न व्यक्ति पक्राउ परेका हुन् ।
घटनामा अपरिचित व्यक्तिले दम्पतीमाथि टाउकोमा प्रहार गरी सुनका गरगहना लुटेको थियो । घाइते दुवैलाई उपचारका लागि भरतपुरस्थित पुरानो मेडिकल कलेज लगिएकोमा जिउराम थनेतको मृत्यु भएको थियो भने गुलबसिया थनेत उपचारपछि बाँच्न सफल भएकी थिइन् ।
घटनापछि केन्द्रीय अनुसन्धान ब्यूरो , प्रदेश प्रहरी कार्यालय पोखरा तथा जिल्ला प्रहरी कार्यालय नवलपुरको संयुक्त टोलीले अनुसन्धान थालेको थियो । सोही क्रममा काठमाडौं महानगरपालिका–४, सुकेधाराबाट घटनामा संलग्न व्यक्तिलाई पक्राउ गरिएको प्रहरीले जनाएको छ ।
पक्राउ पर्नेमा बागलुङ जिल्ला गल्कोट नगरपालिका–९ बस्ने ३१ वर्षीय सञ्जय बिक रहेका छन् । उनलाई नवलपुर जिल्ला अदालतबाट ७ दिनको म्याद थप गरी कर्तव्य ज्यान सम्बन्धी कसुरमा अनुसन्धान भइरहेको प्रहरीले जनाएको छ ।
प्रहरीका अनुसार पक्राउ परेका अभियुक्तबाट नगद रु। ३ लाख ७५ हजार, विभिन्न ब्रान्डका ३ थान मोबाइल सेट, ४ थान एनटीसी सिम र ४ थान एनसेल सिम बरामद गरिएको छ ।
अभियुक्तको विगतमा पनि आपराधिक पृष्ठभूमि रहेको खुलेको छ । २०७२ सालमा कास्कीमा चोरी मुद्दा दर्ता भएको तथा २०८० साल मंसिर ५ गते महिलाको हत्या गरी लुटपाट गरेको घटनामा पक्राउ परेर पुर्पक्षका लागि कास्की कारागारमा रहेकोमा २०८१ वैशाख २४ गते आन्दोलनका क्रममा फरार भएको प्रहरीले जनाएको छ ।
