नवलपुर । नवलपरासी (बर्दघाट–सुस्तापूर्व) नवलपुरमा प्रहरीले एक महिनाको अवधिमा रु. २७ लाख ७९ हजार ६४० बराबरका भन्सार तथा राजश्व छलीका सामग्री बरामद गरेको छ।
जिल्ला प्रहरी कार्यालय नवलपुरका प्रमुख प्रहरी उपरीक्षक युवराज खड्काका अनुसार गएको चैत महिनामा जिल्लाका विभिन्न स्थानबाट भन्सार तथा राजश्व छलेर ल्याइएका कपडा, मोबाइलका डिस्प्ले लगायतका सामग्री बरामद गरिएको हो। बरामद गरिएका सबै सामग्री आवश्यक प्रक्रिया पूरा गरी भन्सार छलिका सामाग्रीहरु थप कारवाही प्रक्रियाका त्रिवेणी भन्सार कार्यालय र राजश्व छलिका सामाग्रीहरुको आवश्यक कारवाहीका लागि राजश्व कार्यालय बुटवल पठाइएको उहाँले जानकारी दिनुभयो।
त्यसैगरी, सोही अवधिमा प्रहरीले जिल्लाका विभिन्न क्षेत्रमा प्राकृतिक सम्पदा दोहनमा संलग्न ३५ वटा सवारी साधन नियन्त्रणमा लिएको छ। ती सवारी साधनबाट रु. २४ लाख ८३ हजार २०० जरिवाना असुल गरिएको प्रहरी उपरीक्षक खड्काले बताउनुभयो। नदीजन्य पदार्थ, माटो लगायतका प्राकृतिक स्रोतको अवैध उत्खनन तथा ओसारपसारमा संलग्न सवारी साधनलाई नियन्त्रणमा लिएर कानुनी कारबाही गरिएको उहाँको भनाइ छ।
यसैबीच, प्रहरी र ट्राफिक प्रहरीको संयुक्त जाँचका क्रममा नियम उल्लङ्घन गर्ने सवारी साधनबाट चैत महिनामा मात्रै रु. १७ लाख ५६ हजार ५०० राजश्व संकलन गरिएको छ।
प्रहरीले जिल्लामा शान्ति सुरक्षा कायम गर्नुका साथै भन्सार तथा राजश्व छली, प्राकृतिक सम्पदा दोहन, अवैध आर्थिक कारोबार तथा सवारी नियम उल्लङ्घन जस्ता गतिविधि नियन्त्रण गर्न सक्रिय रूपमा निगरानी र कारबाहीलाई तीव्र बनाएको प्रहरी उपरीक्षक खड्काले बताउनुभयो।
