सत्र करोड ५६ लाखको लागतमा मध्यविन्दु नगर अस्पताल भवन निर्माण, विशेषज्ञ सेवा समेत उपलब्ध

नवलपुर । नवलपरासी (बर्दघाट–सुस्तापूर्व) जिल्लाको मध्यविन्दु नगरपालिकामा १७ करोड ५६ लाख २८ हजार रुपैयाँको लागतमा नगर अस्पताल भवन निर्माण सम्पन्न भएको छ। मध्यविन्दु नगरपालिका–चोरमारामा निर्माण गरिएको उक्त अस्पताल भवनको आइतबार उद्घाटन गरिएको हो।

२०७९ मंसिरमा शिलान्यास भई निर्माण सुरु गरिएको अस्पताल भवन तीन वर्षको अवधिमा सम्पन्न गरिएको मध्यविन्दु नगरपालिकाका नगर प्रमुख भिमलाल अधिकारीले जानकारी दिनुभयो। चोरमारा प्राथमिक स्वास्थ्य केन्द्रलाई स्तरोन्नति गर्दै १५ शैयाको नगर अस्पताल निर्माण गरिएको उहाँले बताउनुभयो।

४२ कोठासहितको दुईतले सुविधासम्पन्न भवन निर्माण भएसँगै स्वास्थ्य सेवा प्रवाह अझ सहज भएको नगर प्रमुख अधिकारीको भनाइ छ। नवनिर्मित अस्पताल भवनमा ओपीडी, प्रयोगशाला, अपरेशन थियटर, फार्मेसी, अन्तरङ्ग विभाग, प्रशासनिक सेवा तथा चिकित्सक आवास कक्षको व्यवस्था गरिएको छ।

पूर्वाधार सम्पन्न अस्पताल निर्माण भएसँगै अब गुणस्तरीय स्वास्थ्य सेवा विस्तार गर्ने तयारीमा नगरपालिका जुटिरहेको नगर प्रमुख अधिकारीले बताउनुभयो। मध्यविन्दु नगर अस्पतालबाट मध्यविन्दु नगरपालिकाका बासिन्दासँगै विनयी त्रिवेणी, हुप्सेकोट तथा पूर्वी पाल्पाका बासिन्दाले समेत स्वास्थ्य सेवा लिन सक्ने उहाँले जानकारी दिनुभयो।

१५ शैयाको अस्पताल सञ्चालनमा आएपछि उपचार सेवा क्रमशः विस्तार गरिँदै लगिने नगर प्रमुख अधिकारीले बताउनुभयो। यसै महिनादेखि एमडिजिपीसहित दैनिक रूपमा एक जना विशेषज्ञ चिकित्सकबाट सेवा प्रदान गर्ने व्यवस्था मिलाइएको उहाँको भनाइ छ। अस्पतालमा बालरोग, फिजियोथेरापी, हाडजोर्नी लगायतका विशेषज्ञ सेवाहरू सञ्चालनमा ल्याइएको छ।

त्यसैगरी अस्पतालमा आँखा उपचार सेवा समेत सुरु गरिएको छ। शल्यक्रियासहितको आँखा उपचार सेवा उपलब्ध भएपछि यस क्षेत्रका आँखाका बिरामीले थप लाभ लिन सक्ने नगर प्रमुख अधिकारीले बताउनुभयो। ग्रामीण क्षेत्रका बासिन्दालाई आफ्नै घर नजिक सहज रूपमा स्वास्थ्य सेवा उपलब्ध गराउन नगर अस्पतालले महत्वपूर्ण भूमिका खेल्ने उहाँको विश्वास छ।
“सुविधासम्पन्न नगर अस्पताल निर्माण भएसँगै यस क्षेत्रका नागरिकलाई नजिकै सहज रूपमा उपचार सेवा लिन ठूलो राहत मिलेको छ,” नगर प्रमुख अधिकारीले भन्नुभयो।

मध्यविन्दु नगर अस्पतालमा हाल दैनिक करिब ३०० जना बिरामीले उपचार सेवा लिइरहेको अस्पताल प्रमुख अमरेशचन्द्र शाहले जानकारी दिनुभयो। अस्पतालमा आकस्मिक उपचार सेवा पनि सञ्चालनमा रहेको उहाँले बताउनुभयो।

पूर्व–पश्चिम राजमार्गसँगै अस्पताल रहेकोले राजमार्ग आसपास हुने दुर्घटनामा समयमै उपचार सेवा उपलब्ध गराउन नगर अस्पतालले महत्वपूर्ण सहयोग पुर्‍याउने अस्पताल प्रमुख शाहको भनाइ छ।