नवलपुर । नवलपुरको कावासोती हाटबजारमा बिक्रीका लागि राखिएको काउलीमा अत्याधिक मात्रामा विषादी देखिएपछि जफत गरि नष्ट गरिएको छ ।
बजारमा रजहरबाट कृषक बन्चु मियाले उत्पादन गरेको काउली बिक्रीका लागि विभिन्न स्थानीय व्यापारीले राखेका थिए । उक्त काउलीको विषादी परीक्षण गर्दा अर्गानोफस्फेट विषादी ९८ दशमलब ८५ प्रतिशत भेटिएको विषादी अन्वेशण द्रुत विश्लेषण प्रयोगशाला एकाइ नवलपुरका नायब प्राविधिक सहायक बिरेन्द्र भण्डारीले बताउनुभयो ।
सोमबार कावासोती हाटबजारमा बिभिन्न चार स्थानबाट भित्रिएका काउलीको परीक्षणका क्रममा रजहरबाट कृषक मियाले उत्पादन गरेको काउलीमा अध्याधिक रुपमा बिषादी भेटिएपछि जफत गरि नष्ट गरिएको भण्डारीले बताउनुभयो । बजारबाट करिब एक सय ५१ केजी काउली जफत गरि नष्ट गरिएको छ ।
कावासोती हाटबजारमा रहेको प्रयोगशालमा दैनिक रुपमा हाटबजारमा भित्रिने तरकारी जन्य बस्तुको विषादी परीक्षण गर्ने गरिएको छ ।
अर्गानोफस्फेट ३५ प्रतिशत भन्दा कम भएमा उपभोगका लागि योग्य मानिन्छ । तर परीक्षणका क्रममा अत्याधिक विषादी फेलापरेपछि जफत गरि नष्ट गरिएको नायव प्राविधिक सहायक भण्डारीले बताउनुभयो । 
तरकारी उत्पादन गर्ने किसानले आफ्नो उत्पादन बजार पठाउनु पूर्व प्रयोगशालामा ल्याएर विषादी परीक्षण गर्न उहाँले अनुरोध गर्नुभयो । प्रयोगशालामा दैनिक बिहान ६ बजेदेखि निशुल्क रुपमा तरकारीको विषादी परीक्षण गर्ने गरिएको भण्डारीले बताउनुभयो ।
विषादी धेरै भएको तरकारी प्रयोगले मानिसको स्वास्थ्यमा गम्भिर प्रकारको असर गर्ने हुँदा यसमा सबै सचेत बन्नुपर्ने उहाँले बताउनुभयो ।
सोमबार हाटबजारमा आएको एक स्थानको काउलीमा विषादी देखिएर नष्ट गरिएको र अन्य विषादी कम भएका काउली भने बिक्री भइरहेको छ ।
