नवलपुर। विनयी त्रिवेणी गाउँपालिका–६ का किसानले दशैं खर्च जुटाउन बेच्न लागेको खसी–बोका भन्सार प्रक्रियामा अड्किएपछि गाउँपालिकाले गम्भीर ध्यानाकर्षण जनाएको छ।
भाद्र १९ गते किसानले आफ्नै पालिएका खसी–बोका बेचेर जीपमा लोड गरी सुस्ता गाउँपालिका हुँदै लैजाने क्रममा इलाका प्रहरी कार्यालय बेलाटारीले गाडी नियन्त्रणमा लिएर जिल्ला प्रहरी कार्यालयमार्फत महेशपुर भन्सार पठाएको थियो। भन्सार प्रमुखले ती खसीलाई भारतीय भनेर मूल्यांकन गरी रकम तिराएपछि जीप (नं. ग ३ च ४५२९) चालक विश्वास परियार र सवारीधनी पार्वती देवी महासेठलाई समेत थुनामा राखिएको गाउँपालिकाले जनाएको छ। यस घटनामा गम्भीर ध्यानाकर्षण भएको गाउँपालिका अध्यक्ष घनश्याम गिरीले बताउनुभयो ।
गण्डकी प्रदेशको लाइफलाईन भनेर नवलपरासी जिल्ला विभाजन गर्दा विनयी त्रिवेणी गाउँपालिकाको वडा नं. ६ र ७ का जनताहरुलाई आफ्नै कार्यालयसम्म आउने त्रिवेणी दुम्किवास सडक निर्माणलाई प्रकृयाको रुपमा रहेको भनि विभिन्न मन्त्रालयका शाखाहरुमा सहमतिका लागि भन्दै फाइल अड्काउने, काम नगर्ने र त्रिवेणी दुम्किबास सडक निर्माण गर्न पनि नदिने गरेको र अहिले आएर लुम्बिनी प्रदेशको बाटो भएर किसानले उत्पादन गरेको कृषि तथा पशुजन्य वस्तुको व्यापार व्यवसाय गर्न पनि नदिनु सामान्य विषय नभएको पालिका अध्यक्ष गिरीले बताउनुभयो ।
समयमै यसको सत्य तथ्य छानविन गरि दोषीउपर कारवाही नभए, जनताको बाँच्न पाउने अधिकारमा खेलवाड गरी रहेमा र संविधानमा हुँदै नभएका व्यवस्था लागू गर्न खोजेमा हामी विनयी त्रिवेणीवासी सडकमा आई लुम्बिनी प्रदेश र गण्डकी प्रदेशको हालको सिमाना पश्चिमबाट पूर्व गण्डकी प्रदेश हुदै लैजाने मासुजन्य पशु चौपायालाई प्रवेश दिन नसकिने पालिकाले जनाएको छ ।
‘यसरी संविधानमै नभएका व्यवस्था लागू गरेर किसानको जीविकोपार्जनमा रोक लगाउने कार्य बन्द नभए सडकमा उत्रिन बाध्य हुन्छौ ’ अध्यक्ष गिरीले भन्नुभयो ।
