नवलपुर । राष्ट्रिय लोक तथा दोहोरी गीत प्रतिष्ठान नेपालको ७५ सदस्यीय केन्द्रीय टोली नवलपुर आउने भएको छ। प्रतिष्ठानको नवौँ पूर्ण बैठक, पाँचौँ घुम्ती बैठक, आमा घर तथा लोक सांस्कृतिक सङ्ग्रहालय अवलोकन र भव्य सांस्कृतिक कार्यक्रममा सहभागी हुन टोली शुक्रबार कावासोती आइपुग्नेछ।
प्रतिष्ठान नवलपुरले बिहीबार पत्रकार सम्मेलनमार्फत जानकारी दिएको अनुसार बैठक शुक्रबार कावासोती–६ र शनिबार प्रतिष्ठानको नवलपुर कार्यालयमा हुनेछ। सोही दिन आमा घर तथा लोक सांस्कृतिक सङ्ग्रहालयको अवलोकन, संस्थागत भेटघाट र राष्ट्रिय तथा स्थानीय कलाकारहरूका सांस्कृतिक प्रस्तुति रहने कार्यक्रम समेत आयोजना गरिनेछ।
कार्यक्रममा लोकदोहोरी, नृत्य, वाद्यवादन र साङ्गीतिक प्रस्तुति समावेश हुने उपाध्यक्ष दीपक खड्काले जानकारी दिनुभयो। बैठकमा केन्द्रीय समिति, जिल्ला र प्रदेश अध्यक्षहरू समेतको उपस्थिति रहनेछ।
जिल्ला अध्यक्ष बुद्धिनाथ घिमिरेका अनुसार नवलपुरलाई प्रतिष्ठानको जन्मथलो मानेर निर्माणाधीन आमा घर तथा लोक सांस्कृतिक सङ्ग्रहालयलाई साझा सांस्कृतिक धरोहरका रूपमा विकास गरिँदै छ। आगामी पुस्तालाई मौलिक पहिचान र संस्कृतिको ज्ञान दिन यो परियोजना महत्वपूर्ण रहने बताइएको छ।
