कौसीमा लगाएको ड्रागन फलबाट वार्षिक आठ लाख आम्दानी

नवलपुर । नवलपरासी (बर्दघाट सुस्तापूर्व) नवलपुरको कावासोती –९ निवासी सीता जिसी राउतले कौसीमा ड्रागन फल ( सिउँडी फल ) खेती गरेर मनग्य आम्दानी लिन सफल हुनुभएको छ ।
तीन वटा बिरुवाबाट सुरुआत गरेको ड्रागन फलको कौसी खेती अहिले १३५ वटा गमलामा विस्तार भएको छ । उक्त खेति बारीमा पनि बिस्तार गरेर ४२४ वटा पिल्लरमा बोट लगाउनुभएको छ । घरमै खानका लागि भनी चार वर्ष पहिले सुरु गरेको खेति अहिले व्यवसायीक रूपमै गर्न थाल्नुभएको हो । विगत तीन वर्षदेखि उहाँले व्यवसायीक रूपमै कौसीमा ड्रागन फल खेति गर्दै आउनुभएको छ ।
जिसीले युट्युबबाट हेरेर प्रभावित भई कौसीमा ड्रागन फल खेती सुरुआत गर्नुभएको हो । सुरुमा मलेसियन सी भेराइटीको जम्मा तीन वटा बिरुवा २१ सय रुपैयाँमा पनौतीबाट ल्याएर लगाएको र त्यसैबाट अन्य बिरुवा निकालेर बिस्तार गरेको जिसीले बताउनुभयो । कौसीमा खेती सुरु गर्दा २५ हजार लगानी लागेको उहाँले बताउनुभयो । बिरुवा लगाएको नौ महिनामै उत्पादन दिन सुरु गरेको उहाँले बताउनुभयो । उहाँले फल मात्र होइन बिरुवा समेत बिक्री गरेर आम्दानी गर्दै आउनुभएको छ । ‘मैले सुरुमा आफ्नै लागि बिरुवा तयार गरेर त्यही बिरुवा आफूले लगाए , त्यसले राम्रो फल दियो , बिरुवा सफल भएपछि मैले अन्य व्यक्तिहरूलाई पनि बिरुवा बिक्री गर्न थाले , अहिले म कहाँबाट धेरै बिरुवा पनि लैजानुहुन्छ , मैले योपाली करिव दुई लाख रुपियाँको त बिरुवा नै बेचे । ’ जिसीले भन्नुभयो ।
यो वर्ष असार पहिलो साताबाट उत्पादन दिन सुरु गरेको , तीन लट बिक्री गरिसकेको र अहिले चौथो लट टिप्ने काम भइराखेको उहाँले बताउनुभयो । असार महिनामा मात्रै साढे तीन क्विन्टल बिक्री गरिसक्नुभएको छ । अहिले एक क्विन्टल टिपेर बिक्रीका लागि तयारी छ । वार्षिक रूपमा सातदेखि आठ लाख रुपियाँसम्म कूल आम्दानी हुने गरेको जिसीले बताउनुभयो ।
बजारका लागि पनि कुनै समस्या नभएको उहाँको भनाई छ । स्थानीय बजार र मुख्य शहरहरू नारायणगढ , काठमाडौँ देखि बुटवलसम्म उहाँले बिक्री गर्दै आउनुभएको छ ।
पानीको टङ्की राखेका फलामका डन्डी , छतमा प्रयोग भएको रेलिङले नै पिल्लरको काम गर्ने हुँदा कौसीमा लगानी पनि कम लाग्ने , पात नहुँदा झरेर फोहोर हुन्छ भन्ने पिर पनि नहुने , अनि धेरै घाम र थोरै पानी भए पुग्ने भएकाले, कौसी खेतीका लागि ड्रागन फु्रट खेती एकदमै उपयुक्त रहको जिसीले अनुभव सुनाउनुभयो ।
जिसीले कुनै पनि प्रकारका रासायनिक मल प्रयोग गर्नुभएको छैन । घरमै कम्पोस्ट मल , झोल मल र निम पत्ता , पाती लगायतबाट अग्र्यानिक विषादी बनाएर प्रयोग गर्ने गर्नुभएको छ । आफ्नो उत्पादन पूर्ण रूपमा अग्र्यानिक रहेको उहाँले बताउनुभयो ।
खाली समय त्यसै बस्नुभन्दा केही आयस्रोत हुने काम गर्नुपर्छ भन्ने सोच बनाएर जिसीले कौसी खेती सुरु गर्नुभएको थियो । कौसीमा ड्रागन खेती कसरी गर्ने भन्ने युट्युबबाट भिडियो हेरेरै त्यसै अनुसार गरेको उहाँले बताउनुभयो । भिडियो देखेपछि , हुन्छ कि हुँदैन बिचार गरौँ भन्ने सोचले सुरु गरेको ड्रागनको कौसी खेतीले जिसीलाई उदाहरणीय महिलाका रूपमा परिचित बनाउन सफल भएको छ ।