धार्मिक पर्यटकीय क्षेत्र घुमारी घाट ओझेलमा, राधाकृष्ण मन्दिरले पूर्णता नपाउँदा जीर्ण बन्दै

नवलपुर । नवलपरासी (बर्दघाट सुस्ता पूर्व ) नवलपुरको पहाडी क्षेत्रमा पर्ने धार्मिक पर्यटकीय क्षेत्र घुमारी घाट ओझेलमा परेको छ । जिल्लाको बुलिङटार गाउँपालिका –६, मा रहेको धार्मिक पर्यटकीय क्षेत्र घुमारी घाटमा पूर्वाधार विकास सहित प्रचार प्रसार नहुँदा ओझेलमा परेको हो ।
कालिगण्डकी कोरिडोरसँगै जोडिएको घुमारी घाट प्राकृतिक रूपमा मनमोहक रहेको छ । कालिगण्डकी नदीले शङ्ख–आकारको घाट बनाएको यो स्थानलाई कृष्णसँग जोडिएको धार्मिक कथाले भरिएको छ। घुमारी घाटमा द्वापर युगमा भगवान् श्रीकृष्णले कामधेनु गाई चराउँदै आउँदा गाईको दूध खाएको धार्मिक विश्वास रहेको छ । सो स्थानमा भगवान् कृष्णले दूध खाँदा बग्दै आएकी काली नदी श्रीकृष्णलाई बचाउन घुमेर बगेको बताइन्छ ।
कालिगण्डकी नदीले करिब पाँच सय रोपनी क्षेत्रफलमा शङ्ख –आकारको प्राकृतिक घेरा बनाएको छ । कालिगण्डकी नदी घुमेर बगेको प्राकृतिक रूपमा मनमोहक स्थान भए पनि घुमारी क्षेत्र ओझेलमा पर्दै आएको स्थानीय समाजसेवी डिबी गुरुङले बताउनुभयो । कालिगण्डकी नदी बग्दै आउँदा यति सुन्दर भएर घुमेको र धार्मिक मान्यतासँग समेत जोडिएको स्थल भए पनि यसको विकास र प्रवद्र्धनमा खासै कसैले चासो नदिएको उहाँले बताउनुभयो । घुमारी क्षेत्र पुग्ने बाटो स्तरोन्नतिको कामले समेत पूर्णता पाउन नसक्दा धेरै मान्छे उक्त स्थल नपुग्ने गरेको उहाँले बताउनुभयो । ‘पहुँच मार्ग सहज हुने हो भने कालिगण्डकी करिडोरहुँदै यात्रा गर्ने जो कोही यसको अवलोकनका लागि आउँथे होला, बाटोको पनि असुविधा छ, पुरै बन्न सकेको छैन ’ गुरुङले भन्नुभयो ।
घुमारीको विकासका लागि केही वर्ष पहिले काम अघि बढेको भए पनि हाल अलपत्र जस्तै बन्न पुगेको छ । पाँच वर्ष पहिला निर्माण सुरु गरिएको राधाकृष्ण मन्दिर अहिले अलपत्र अवस्थामा रहेको छ । मन्दिरले पूर्णता नपाउँदा बनेका संरचनाहरू समेत जीर्ण बन्दै गएको छ । गण्डकी प्रदेश सरकार मार्फत २)७७ सालमा मन्दिरको संरचना निर्माण सुरु गरिएको थियो । पछिल्ला वर्षहरूमा उक्त स्थानका लागि बजेट नपर्दा अलपत्र बनेको स्थानीय गुरुङको भनाई छ ।
सुरु गरिएको कार्यलाई पूर्णता दिनेगरि योजना नबनाउँदा घुमारीमा हाल रहेका संरचना थप जीर्ण भएर भग्नावशेषमा परिणत हुने चिन्ता छाएको छ । निर्माण सुरु गरिएको योजनालाई पूर्णता दिने साथै यसको प्रचारप्रसार र प्रवद्र्धनमा लाग्नुपर्ने उहाँले बताउनुभयो ।
पर्यटन तथा उद्योग कार्यालय नवलपुरका कार्यालय प्रमुख निर्मल राज बरालले जिल्लाको अन्य पर्यटकीय क्षेत्रमा केही पूर्वाधार विकासको लागि बजेट र योजना भए पनि घुमारीका लागि चालु आवमा केही कार्य नभएको बताउनुभयो । जिल्लाको पर्यटकीय क्षेत्रका विकासका लागि आगामी आर्थिक वर्षको योजनामा समेत घुमारी कतैबाट सिफारिस नहुँदा सो स्थानमा काम गर्न सक्ने अवस्था नभएको उहाँको भनाई रहेको छ ।