गीत , कविता र सफलताको अनुभव बाँड्दै कावासोतीले मनायो अन्तराष्ट्रिय महिला दिवस

कावासोती । विभिन्न तहतप्का र सर्वसाधारणका रुपमा रहेका कावासोतीका महिलाहरूले आफूले भोगेका सुखदुःखका कथाव्यथा , संघर्ष र सफलताले भरिएका अनुभव , गीत र कविता सुनाउदा , कावासोती नगरपालिकाको सभाहल गुञ्जायमान बन्यो । कतिपयका आँखा रसाए त कतिपयले हिम्मत र हौसला पाए ।

११४ औँ अन्तराष्ट्रिय नारी दिवसको पूर्वसन्ध्यामा आज कावासोती नगरपालिकाले आयोजना गरेको अन्तरकृया , कविता वाचन तथा असल अभ्यास सिकाइ आदान प्रदान कार्यक्रममा सहभागि भएका महिलाहरूले मन खोलेर आफ्ना अनुभव बाँडे । संघर्ष गर्दै लड्दै फेरि उठेर जीवनमा सफल भएका आफ्ना वास्तविक कथा सुनाए । कोहीले कविताको माध्यमबाट समसामयिक विषयवस्तुलाई उजागर गरे त कोहीले महिलाको हक अधिकार मागेर नपाए खोसेर लिन सक्नुपर्छ , महिला पछि पर्नु हुँदैन , अगि बढ्नुपर्छ भन्ने भाव व्यक्त गरे । कोहीले विगतमा महिलामाथि हुने हिंसा र विभेदलाई कविता मार्फत सम्झिए भने कोहीले आजको बदलिदो परिवेशमा बदलिएको हिंसाको स्वरुप र बदलिएको सामाजिक परिवेशमा महिलाको अवस्थालाई वर्णन गरे । कार्यक्रममा सर्वसाधारण महिलामात्रै आफ्ना सृजना सुनाएनन् । प्रदेश सभा सदस्य पदमा जिसी र विन्दु पहारीले पनि कविता मार्फत आफ्ना भाव व्यक्त गर्नुभयो । कावासोती नगरपालिकाका कर्मचारी र सदस्यहरूले पनि मन खोलेर आफ्ना भावनालाई गीत र कविता मार्फत व्यक्त गरे ।

कावासोती नगरपालिकाले यस वर्षको नारी दिवस भाषण मात्रै गरेर होइन महिलाका प्रतिभाहरूलाई पनि उजागर गर्दै उद्यमशील बनेर माथि उठेका महिलाहरूको कथा सुनाई सबै महिलाहरूलाई आत्मनिर्भर बन्न प्रेरित गर्ने उद्देश्य सहित असल अभ्यास सिकाइ आदान प्रदानको कार्यक्रम गरेर मनाएको छ ।

कार्यक्रममा कावासोती ४ कि सफल कृषक मेसमाया गुरुङ , कावासोती १६ कि कुखुरापालक कृषक मिना सुनार , कावासोती आठ की कुटानी पिसानी व्यवसायी र कृषक समेत रहनुभएकी बिकन कुमारी महतो र अमलटारी होम स्टे सञ्चालक धनमाया महतोले आफू कसरी सफल व्यवसायी बन्न सकियो र आफूजस्तै अन्य महिलाहरूलाई पनि उत्प्रेरित गरेर आत्मनिर्भर बनाउन सफल भइयो भन्ने बारेमा आफ्ना व्यवसायीक जीवन कथाको माध्यमबाट जानकारी प्रदान गर्नुभएको थियो ।

कृषक मेसमाया गुरुङले शून्यबाट सुरु भएर आज वर्षको आठदश लाख रुपैँया आम्दानी गर्न सक्ने भएको सफलताको कथा सुनाउनुभएको थियो ।
सुरुआतको पहिलो वर्ष उत्पादन भएर बिक्री गर्ने समयमा कोभिडले सबै कुहिएर फाल्नु परेको तीतो अनुभव सुनाउँदै उहाँले तर पनि हिम्मत निहारिकन पुन व्यवसायलाई निरन्तरता दिएको र आज सफल भएको सुनाउनुभयो ।
कुटानी पिसानी व्यवसायी र कृषक समेत रहनुभएकी बिकन कुमारी महतोले त आफूले ३५ रुपैयाँको बीउ किनेर एक कठ्ठामा तरकारी खेती सुरुआत गरेर आज मिल सञ्चालकसमेत बन्न सफल भएको अनुभव सुनाउनुभयो । सहकारीको कृषि तालिममा सहभागि भएर त्यहाँबाट पाएको केही बीउबिजन र आफूले ३५ रुपैयाँ थप गरेर किनेको बीउबीजनबाट कृषि व्यवसाय सुरु गरेर ६ जना छोरीको लालनपालन र शिक्षादीक्षा दिन सफल भएको उहाँले बताउनुभयो । एक कठ्ठाबाट सुरु गरेको व्यवसाय बढाउँदै गएर मिल सञ्चालन गर्नेसम्म बनेको उहाँले सुनाउनुभयो ।

कुखुरापालक कृषक मिना सुनारले पनि सानो लगानीबाट व्यवसाय सुरु गरेर आज त्यसै व्यवसायबाट आफ्नो घरपरिवार चलाउन बालबच्चा पठाउन सकेको बताउनुभयो । आफूमा हिम्मत र आँट गर्ने हो भने सफल हुन सकिदो रहेछ भन्ने पाठ आफैँबाट सिकेको उहाँको अनुभव थियो ।

होम स्टे सञ्चालक धनमाया महतोले २०७० सालमा सबैभन्दा पिछडिएको वर्ग माझी मुसहर , थारू समुदायलाई एकितृत गर्दै सुरुआत गरेको होम स्टे व्यवसाय अहिले देशमा मात्रै नभइ विदेशमा समेत चिनिन सक्ने बनेको बताउनुभयो । जल जमिन र जङ्गलमा आश्रित रहने समुदाय अहिले होम स्टे सञ्चालन गरेर मासिक रुपमा ५० हजारसम्म आम्दानी गर्न सक्ने भएको बताउनुभयो । होम स्टे कै कारण देशविदेशका पाहुनाहरू आउने र उहाँको कला संस्कृति हेर्ने बुझ्न र अध्ययन समेत गर्ने गर्दा देशमा मात्रै नभई विदेशमा पनि कावासोतीको परिचय बनेको बताउनुभयो । महिलाहरूले नै होम स्टेको सञ्चालनको जिम्मेवारी लिएकाले महिलाहरूको क्षमतामा समेत वृद्धि भएको उहाँको भनाई थियो ।

कार्यक्रममा बोल्दै गण्डकी प्रदेश सभा सदस्य पदमा जिसीले महिलाहरूले आफ्नो क्षमता बढाउँदै अग्रसर बन्न जरुरी रहेको बताउनुभयो । उहाँले अब पनि भएन भएन मात्रै भन्ने होइन आफ्नो गाउँ समाज र देश बनाउनका लागि आफूले पनि पहल गर्ने काम गर्ने गर्न उहाँले महिला दिदीबहिनीहरूलाई सुझाव दिनुभयो । उहाँले अबका महिला आत्मनिर्भर बन्न जरुरी रहेको बताउनुभयो । आफ्नो घर परिवार र समाजमा मिलेर बस्ने , सकारात्मक बन्ने सम्य भएर आफ्ना कुरा राख्ने गर्न समेत आग्रह गर्नुभयो । ,
उहाँले नारी दिवस बनाउने परम्पराको सुरुआत कसरी भयो । राजनैतिक सामाजिक रूपान्तरण गर्न महिलाले गरेका संघर्ष त्याग र बलिदानका बारेमा समेत चर्चा गर्नुभएके थियो ।

यसैगरी गण्डकी प्रदेश सभा सदस्य विन्दु पहारीले सङ्घर्षबाट कहिल्यै थाक्न नहुने बताउनुभयो । आफू पनि सङ्घर्षबाट नै आज सफल भएको भन्दै जीवनमा धेरै दुख कष्टहर आएपनि त्यसलाई हरेस नखाई सामना गर्न अनुरोध गर्नुभयो ।

कावासोती नगरपालिका प्रमुख विष्णु प्रसाद भुषालले सबैमा शुभकामना व्यक्त गर्दै नारी शक्तिको स्वरुप भएको जिकिर गर्नुभयो । हिजोको परिवेश र आजको परिवेश फरक रहेको भन्दै उहाँले आजका नारी आफैमा सक्षम रहेको र सबै महिलाहरु आत्मनिर्भर र सक्षक बन्न जरुरी रहेको बताउनुभयो ।
वडा नम्बर तीनका अध्यक्ष डोरमान गिरी , समाजसेवी लिला थनेत , शिव मन्दिर महिला बहुउद्देश्यीय सहकारीका अध्यक्ष गीता अर्याल लगायतले शुभकामना मन्तव्य राख्नुभएको थियो ।
कार्यक्रममा प्रमुख प्रशासकीय अधिकृत लिलाराज पौडेलले आर्थिक र सामाजिक सशक्तिकरणको लागि महिलामा लगानी किन ? भन्ने विषयमा कार्यपत्र प्रस्तुत गर्नुभएको थियो ।

कावासोती नगरपालिका उपप्रमुख फूलकुमारी थनेतको अध्यक्षतामा भएको कार्यक्रममा महिला बालबालिका तथा ज्येष्ठ नागरिक शाखा प्रमुख सुशीला तिमिल्सिनाले स्वागत मन्तव्य राख्नुभएको थियो भने , सुभद्रा शर्माले सहजीकरण गर्नुभएको थियो ।
कार्यक्रमको समापन गर्दै कावासोती नगरपालिका उपप्रमुख फूलकुमारी थनेतले कावासोती नगरपालिकाले महिलाहरूलाई उद्यमशील बनाउन विभिन्न १६ प्रकारका उद्यमशील तालिम प्रदान गरेको बताउनुभयो । तालिम प्राप्त गरेपछि महिलाहरूले उद्यमशील बन्नका लागि पहल गर्न समेत आग्रह गर्नुभयो । उहाँले महिलाका लागि आफूले आफ्नो ठाउँबाट सकेको काम गर्ने प्रतिबद्धता समेत जनाउनुभयो ।
कार्यक्रममा महिला सहकारी , जनप्रतिनिधि , सरोकारवाला , उद्यमी लगायतको सहभागिता रहेको थियो ।