बौदीकालीका स्थानीयलाई खोलाले छेक्दैन सदरमुकाम पुग्न !

डेढगाउँ ।बर्षा याममा खोला बढेर सदरमुकाम सम्म पुग्न नसकिने समस्या चाडै समाधान हुने भएको छ । जिल्लाको पहाडी क्षेत्र अन्र्तगत पर्ने बौदीकाली गाउँपालिकाबाट सदरमुकाम कावासोती सम्म पुग्दा बाटोमा पर्ने बौदीखोला र निरन्दी खोलामा पुल निर्माण प्रक्रिया शुरु भएपछी यो समस्या चाडै हल हुने भएको हो ।
डेढगाउँबाट करिब ५२ किलोमिटरको दुरीमा रहेको सदरमुकाम कावासोतीलाई बाह्रैमासे यातायातले जोड्न कच्चि सडकको समस्या छदै छ । यो संगै यस सडक खण्डमा पर्ने बौदीखोला र निरन्दी खोलामा पुल नहुदा वर्षा याममा कावासोती र बौदीकाली बिच सम्पर्क बिच्छेद हुने गर्दछ ।
दलदले–पोखरी–धौवादी–राईकोट–बबक–देउराली–डोढ भञ्ज्याङ्ग –खहरे चौतारी हुदै डेढगाउँ सम्म पुग्ने सडक खण्डमा यि दुई खोला पर्दछ ।हिउँदमा पानी सुकेर यातायात सञ्चालनमा सहज हुने भएपनी पुल नहुदा वर्षामा आउने भेलका कारण यो बाटो भएर यात्रा गर्न असम्भव जस्तै रहेको छ ।
दुवै खोलामा पुल बने यातायात सञ्चालनमा वर्षा याममा कुनै अवरोध नहुने बबकका स्थानीय गेस बहादुर रानाले बताउनुभयो ।
बौदीकाली –१, मिथुकरम र बौदीकाली –२, डेढगाउँ बिचमा पर्ने शेरा स्थित बौदीखोलामा तीन करोड ४६ लाख ६५ हजार २६०को लागतमा पुल निर्माणको कार्य जारी रहेको छ । आउदो असोज महिना सम्ममा निर्माण सक्ने गरि वाईएसएस , एचएनएस जेभीले काम गरिरहेको पूर्वाधार विकास कार्यालय नवलपरासी पूर्वका प्रमुख रविन्द्र तिवारीले बताउनुभयो ।

यसै सडक अन्र्तगत छमुरेघाटमा रहेको निरन्दी खोलामा समेत पुल निर्माणको प्रक्रिया शुरु हुन लागेको उहाँले बताउनुभयो ।
निरन्दी खोलाको पुल समेत आगामी आर्थिक वर्ष भित्रमा निर्माण सम्पन्न गर्ने लक्ष्य रहेको कार्यालय प्रमुख तिवरीले बताउनुभयो ।

बौदीकाली वडा नम्बर ५ बबक र वडा नम्बर ६ नरमलाई जोड्ने गरि छमुरेघाट स्थित निरन्दीमा पुल निर्माणपछी थप सहजता मिल्ने बौदीकाली गाउँपालिका वडा नम्बर ५ का वडा अध्यक्ष खिम बहादुर खरुले बताउनुभयो ।

दुवै पुल निर्माण सम्पन्न भएपछी यातायात सञ्चालनमा सहजता हुने छ । तर कच्ची सडकको समस्या बर्षामा भने उस्तै रहने छ । वर्षा याममा ठाउँ ठाउँमा बाटो भत्कीँदा यात्रा गर्न कठिन हुने गर्दछ ।

यसै सडक खण्ड केही समय अघि प्रधानमन्त्री केपी शर्मा ओलीले शिलान्यास गरेको १६५ रणनितिक सडकमा परेकाले चाडै सडकको स्तरोन्नती भएर बाह्रै महिना सहज रुपमा यात्रा गर्न सकिनेमा पहाडी क्षेत्रका बासिन्दा आसावादी रहेका छन् । सम्बन्धीत क्षेत्रका सांसदले छनौट गरे अनुसार दुई निर्वाचन क्षेत्र भएका जिल्लाका लागि एउटा सडककालागि रु. ४० करोड छुट्याइएको छ । तीन आर्थिक वर्ष भित्रमा निर्माण सम्पन्न हुने जनाईएको छ । सडक दुई लेनको कालोपत्रे हुने छ । यस योजना मार्फत डेडगाउँ कालिगण्डकी पुल देखी १५ किलोमिटर सम्म कालोपत्रे गर्ने लक्ष्य रहेको छ ।