एमाले नवलपुर क्षेत्र नं.एकको शैक्षिक क्षेत्र तर्फको प्रतिबद्धता : पूर्वाधार विकास र शिक्षक कर्मचारीको दरबन्दीको व्यवस्था

कावासोती । नवलपुर क्षेत्र नं. एकबाट नेकपा एमालेको तर्फबाट उम्मेद्वारी दिनुभएका प्रतिनिधि र प्रदेशसभा तर्फको उम्मेदवारहरूको शैक्षिक क्षेत्र तर्फको साझा प्रतिबद्धतामा विद्यालय क्याम्पसहरूलाई कक्षा कोठा , विज्ञान प्रयोगशाला , पुस्तकालय आईटी कक्ष लगायतका पूर्वाधार र शिक्षक कर्मचारीको दरबन्दीको व्यवस्था मिलाउने मुख्य प्रतिबद्धता रहेको छ ।
यस्तै गुणस्तरीय शिक्षा र प्राविधिक धार तर्फका कक्षाहरु सञ्चालन गर्ने वातावरण सिर्जना गर्ने , विद्यालय गुरुकुल , मदरसा , सामुदायिक तथा आंगिक क्याम्पसहरूलाई एक संस्था , एक विशेष कार्यक्रम मार्फत उत्कृष्ट शैक्षिक संस्थाको रुपमा विकास गर्ने र विद्यालयहरूमा मन्टेश्वरी कक्षा सञ्चालन गर्ने प्रतिबद्धता व्यक्त गर्नुभएको छ । नेकपा एमालेको तर्फबाट प्रतिनिधि सभा सदस्य नवलपुर क्षेत्र नं. एक मा कृष्ण पौडेल उम्मेद्वार रहनु भएको छ । यस्तै प्रदेश सभा तर्फ क्षेत्र नं. एक क मा रबिन्द्र अधिकारी , एक ख मा रोशन बहादुर गाहा र गण्डकी प्रदेश समानुपातिकमा टङ्क माकिम मगर उम्मेद्वार हुनुहुन्छ । उहाँहरूले आफूहरूले जितेमा गरेका प्रतिबद्धता पुरा गरेर छाड्ने समेत बताउनुभएको छ । आफ्नो आफ्नो क्षेत्रमा घरदैलो अभियान तथा मतदाता भेटघाटमा क्षेत्र नं. एकबाट उम्मेद्वारी दिनुभएका एमाले उम्मेदवारहरूले मतदाताहरूलाई आफ्ना प्रतिबद्धता सुनाउने गर्नुभएको छ ।