कावासोती – नवलपुरको गैडाकोट १० भेडाबारीमा रहेको किसान बचत तथा ऋण सहकारी संस्थाबाट ५ लाख ९१ हजार नगद चोरी भएको छ ।
जिल्ला प्रहरी कार्यालय नवलपुरले दिएको जानकारी अनुसार गएराति सहकारीको सटर फोरेर कार्यालयको सेफमा रहेको नगद चोरी भएको हो । चोरहरूले सटर फोर्दै गरेको अवस्थामा सहकारीको आडैमा रहेको मुकुन्द सेन दूध संकलन केन्द्रमा काम गर्ने कृष्ण पाण्डेले थाहा पाइ बाहिर निस्किंदा पाण्डेको मुख र आँखामा पट्टी बाँधेर मारिदिने धम्की दिएको प्रहरीले जनाएको छ । पाण्डेले दिएको बयानका अनुसार घटनामा तीन जनाको सङ्ख्यामा चोरहरू रहेका थिए । प्रतिकार गर्नेक्रममा मार्ने धम्की दिएको पाण्डेले बयान दिएका छन् । पाण्डेले आज बिहान साढे चार बजे खबर गरेपछि अस्थाई प्रहरी पोष्ट बेल्डियाबाट टिकाराम पोख्रेलको कमान्डमा चार जनाको प्रहरी टोली घटना स्थल पुगेको थियो ।
प्रहरीले घटनाको बारेमा थप अनुसन्धान जारी राखेको छ । बागमती प्रदेश प्रहरी कार्यालय हेटौँडाबाट तालिम प्राप्त कुकुर ल्याएर अनुसन्धान गरिने प्रहरी सहायक निरीक्षक निशान कुमार बिकले जानकारी दिनुभएको छ ।
