कावासोती । नवलपुरको कावासोती नगरपालिकामा चालु शैक्षिक शत्रदेखि स्थानीय पाठ्यक्रम मेरो कावासोती – मेरो गौरव लागू भएको छ ।
राष्ट्रिय पाठ्यक्रमले समेट्न नसकेका स्थानीय विषयवस्तुलाई प्राथमिकतामा राखेर स्थानीय पाठ्यक्रममा समावेश गरिएको छ । जसमा कावासोती नगरपालिका भित्रको , वन वातावरण , सम्पदा, स्थानीय पेशा व्यवसाय र आर्थिक कृयाकलाप , सामाजिक संस्थाहरू , आनिबानी तथा स्वास्थ्य र प्राकृतिक प्रकोप र जोखिम व्यवस्थापन , प्राकृतिक सम्पदा , यहाँको संस्कार संस्कृती र रहनसहन , योगा , आदर सत्कार , शासकीय अवस्था लगायतका विषय समेटिएको छ । समग्र रुपमा कावासोती नगरपालिका भित्रको आर्थिक , सामाजिक , भौतिक तथा शासकीय पक्ष , वनवातावरण , आचरण बानीव्यहोरा , यहाँको जनसांख्यिक अवस्थाका बारेमा विद्यार्थीहरूलाई कक्षाकोठाभित्र मात्र पढाएर नहुने व्यवहारिक सिकाइ प्रदान गर्नुपर्छ भन्ने उद्देश्यले स्थलगत स्काईलाई पाठ्यक्रममा अनिवार्य गरिएको छ ।
विद्यार्थीहरूलाई सैद्धान्तिक ज्ञान मात्रै होइन् व्यवहारिक ज्ञान समेत प्रदान गर्ने , निश्चित केही सीपहरू अनिवार्य रुपमा सिकाउने गरेर स्थानीय पाठ्यक्रमका विषयवस्तु तय गरिएको छ । जसलाई अहिले नगरभित्र रहेका सामुदायिक र संस्थागत विद्यालयहरूले अवलम्बन गरिरहेका छन् ।
नगरभित्र रहेका केही विद्यालयहरूले स्थानीय पाठ्यक्रममा आधारित रहेर व्यवहारिक सिकाइ प्रदान गर्न स्थलगत सिकाइमा विद्यार्थीहरूलाई जोड्न थालेका छन् । विद्यालयहरूले कावासोती नगर कार्यपालिकाको कार्यालय , नगरभित्र रहेका पोखरी ताल , टरुवा ताल , महाराजा मन्दिर , थारू सङ्ग्रहालय , बौद्ध गुम्बा , मध्यविन्दु जिल्ला अस्पताल , खानेपानी तथा सरसफाइ संस्था , नेपाल रेडक्रस सोसाइटी जस्ता सामाजिक संघसंस्था , सरकारी कार्यालय , धार्मिक स्थल र पर्यटकीय स्थलहरूमा विद्यार्थीलाई स्थलगत अवलोकन गराउनुका साथै सम्बन्धित व्यक्तिहरूसँग प्रत्यक्ष रुपमा जानकारी लिने , अन्तरसम्वाद गर्ने , छलफल गर्ने लगायतका कृयाकलापमा विद्यार्थीहरू संलग्न भएका छन् ।
कावासोती आठमा रहेको नोवेल एकेडेमीले कक्षा कक्षा तीन , चार पाँचका विद्यार्थीहरूले कावासोती नगरपालिकामा नगर प्रमुख विष्णु प्रसाद भुसाललाई भेटेर छलफल गर्नुका साथै नगरपालिकाको कार्य , नगर कार्यपालिकाको निर्माण प्रकृया , वडा कार्यालय सम्पादन हुने काम , जनप्रतिनिधि , नगरपालिकाले शिक्षा क्षेत्रमा गरेको लगानी , विकास निर्माणका काम जस्ता विषयमा जिज्ञासा राखे । नगर प्रमुख भुसालले त्यसका बारेमा विद्यार्थीहरूलाई जानकारी प्रदान गर्नुभयो । सो अवसरमा कावासोती शिक्षा शाखा प्रमुख क्षेत्र बहादुर भण्डारी , शिक्षा शाखा अधिकृत राजन पाण्डे , श्रोत व्यक्ति तीर्थ कँडेलले समेत विद्यार्थीहरूलाई सहजीकरण गर्नुभयो ।
कावासोतीको ज्ञानोदय मावि , शान्ति निकुञ्ज मावि , सिद्धार्थ आवासी मावि लगायतका विद्यालयहरूले पनि व्यवहारिक सिकाइ अन्तरगत नगरपालिका , यहाँका धार्मिक र पर्यटकीय स्थलमा अवलोकन भ्रमण गराइसकेका छन् ।
कावासोती नगरपालिका शिक्षा शाखा अधिकृत राजन पाण्डेले कावासोती नगरपालिकाले निर्माण गरेको स्थानीय पाठ्यक्रम अनुसार अहिले नगरका विभिन्न विद्यालयहरूले स्थलगत सिकाइमा विद्यार्थीलाई संलग्न गराउने सिलसिला चलेको बताउनुभयो । कतिपय विद्यालयले नगरपालिका , कतिपयले पर्यटकीय स्थल , सार्वजनिक तथा परोपकारी संघसंस्था, धार्मिक स्थल , स्वास्थ्य संस्थाहरूमा स्थलगत अध्ययन , अवलोकन गराएर स्थानीय पाठ्यक्रममा समावेश व्यवहारिक ज्ञान प्रदान गर्ने विषयलाई सार्थकता दिएको उहाँले बताउनुभयो ।
नगरपालिकाले कक्षा आठसम्म लागू हुने गरेर १०० पूर्णाङ्कको पाठ्यक्रम नै लागू गरेको हुँदा, व्यवहारिक सिकाको सिलसिला नियमित रुपमा नै सञ्चालन हुने उहाँले बताउनुभयो । नगरपालिकाले स्थानीय पाठ्यक्रममा आधारित रहेर पाठ्यपुस्तक निर्माण गर्ने कार्य पनि गरिहहेको छ । यस वर्ष सम्भव भए कक्षा पाँच सम्म नभए कक्षा तिनसम्म्को पाठ्यपुस्तक लेखन कार्य पनि सम्पन्न गर्ने उहाँले जानकारी दिनुभयो ।
