स्थानीय तह निर्वाचन : दलहरूको प्राथमिकतामा मतदाता शिक्षा 

यही बैशाख ३० गते हुने स्थानीय तहको निर्वाचनलाई लक्षित गर्दै दलहरूले मतदाता शिक्षालाई समेत प्राथमिकता दिएका छन् ।
नवलपुरमा  रहेका दलहरू नेकपा एमाले , नेपाली काङ्ग्रेस , नेकपा माओवादी , राप्रपा लगायतका ठूलादेखि साना दल र स्वतन्त्र उम्मेदवारहरूले समेत  घरदैलो गर्दै आफ्नो चुनाव चिन्हमा कसरी मत हाल्ने भनेर मतदातालाई जानकारी गराउँदै हिँडेका छन् । दलहरूले  नमुना मतपत्र मार्फत आफ्ना उम्मेदवारलाई मत हाल्न सिकाउनुका साथै , मतपत्र पट्याउने कसरी भनेर समेत सिकाउँदै हिँडेका छन् ।  
नेकपा एमाले कावासोतीमा  युवासङ्घमा आबद्ध युवा तथा एमाले कार्यकर्ताहरूले आज पनि कावासोती ३ को विभिन्न ठाउँमा मतदातालाई  नमुना मतपत्र मार्फत मतदान गर्ने तरिका बारेमा जानकारी गराएका छन् । एमालेले  कावासोती नगरपालिकाको मेयर उपमेयर तथा विभिन्न वडाका वडा अध्यक्ष तथा सदस्यहरू सहित घरदैलो कार्यक्रम गर्नेक्रममा समेत मतदाता शिक्षा पनि सँगै प्रदान गर्दै आएको छ ।  नवलपुरमा नेकपा एमालेको चुनाब चिन्ह सूर्य पहिलो नं.  छ ।  एमाले नेताकार्यकर्ताहरूले मतपत्रको  पहिलो नं. रहेको सूर्य चुनाब चिन्हमा, अन्त्यमा रहेको दुईवटा सूर्य चिन्ह  समेत गरेर, सात ठाउँमा लस्करै कोठाभित्र दायाँबायाँ कतै नलाग्ने गरेर  स्वस्तिक छाप लगाउन मतदातालाई जानकारी गराउँदै मतदाता शिक्षालाई जोड दिएको छ । साथै मतपत्र सही तरिकाले पट्याउन समेत सिकाउने गरेका छन् । एमालेले आठ सूर्य सात छाप भन्ने नारानै लिएर मतदाता शिक्षा सञ्चालन गरेको छ । 

बैशाख ३० गते हुने निर्वाचनका  लागि नवलपुरमा पनि कतिपय पालिका तथा वडाहरूमा गठबन्धन भएकाले मतदाताहरू झुक्किन सक्छन् कि भनेर गठबन्धनका दलहरूले समेत आफ्ना उम्मेदवारलाई कसरी मत हाल्ने भनेर जानकारी गराउँदै हिँडेका छन् ।  गठबन्धनमा मत हाल्दा चुनाब चिन्ह फरक – फरक हुने भएकाले मतदाताहरू  अलमलमा पर्छन् कि भन्ने चिन्ता समेत गठबन्धनका उम्मेदवारलाई रहेको छ ।
आफ्ना मतदाताहरूले दिएको मत खेर नजाओस् भन्नका लागि दलहरूले मतदाता शिक्षालाई समेत प्राथमिकता दिएका छन् । मतदान गर्ने सही तरिका नजानेमा मतदाताले हालेको मत खेर जाने हुँदा दलहरूले मतदाता शिक्षामा जोड दिएका हुन् ।
विगतमा भएका निर्वाचनमा सरकारले नै घरघमा पुगेर सहजकर्ता मार्फत मतदाता शिक्षा सञ्चालन गर्दै आएको थियो । तर, यस वर्ष सरकारी स्तरबाट घरघरमै पुगेर मतदाता शिक्षा कार्यक्रम भएन् । मतदाता शिक्षा कार्यक्रम प्रभावकारी नभएको भन्दै  अहिले कार्यक्रम गरिएन । विभिन्न सञ्चार माध्यमबाट मतदाता शिक्षा सम्बन्धी सामाग्री प्रकाशन र प्रसारण गर्ने कार्य भने भएको छ । कतिपय ठाउँमा नमुना मतदानका कार्यक्रम भए पनि नवलपुरमा भने भएको छैन् ।