वडा अध्यक्षद्धारा तलब भत्ताको रकमबाट आमा समूहलाई आर्थिक सहयोग

एलिना केसी ।गैंडाकोट । पूर्वी नवलपरासीको गैंडाकोट नगरपालिका वडा नं १६ का वडाध्यक्ष गोबर्धन ज्ञवालीद्वारा वडाभित्र रहेका १० वटा आमा समूहलाई आर्थिक सहयोग गर्नुभएको छ । शुक्रबार गैंडाकोट नगरपालिका वडा नं १६ को राम मन्दिरमा एक कार्यक्रमको आयोजना गरि आमा समूहलाई रकम हस्तान्तरण गर्नुभएको हो ।
वडाध्यक्ष ज्ञवालीले आफ्नो तलब भत्ताको रकमबाट वडाका आमा समूहहरुलाई प्रति समूह दश हजार गरि १ लाख सहयोग हस्तान्तरण गर्नुभएको छ । देवचुली वडा नं १६ मा रहेको झरही खोला आमा समूह, सितल आमा समूह, शान्ति आमा समूह, सफल आमा समूह, सिर्जना आमा समूह, दुर्गा मन्दिर आमा समूह, दिग्विजय आमा समूह, नमूना आमा समूह, सुनखरी आमा समूह र जनजागृत आमा समूह गरि १० वटा आमा समूहलाई सहयोग गर्नुभएको छ । उहाँले आर्थिक सहयोग हस्तान्तरण गर्दै जनप्रतिनिधि भनेका जनताको सेवा गर्ने भएकाले जनताको करबाट जनतालाई सहयोग गर्नुपर्ने बताउँदै आँफू जनप्रतिनिधि हुँदा देखि नै जनताको करबाट उठेको तलब भत्ताको विरोध गरेको बताउनुभएको थियो । वडाध्यक्ष ज्ञवालीले आँफू सधै जनताको दुःखसुखमा सहयोग गर्ने बताउनुभएको छ ।
वडाध्यक्ष ज्ञवालीले यस अघि पनि बेल्डिहा चौकीलाई ७ थान पंखा, दुर्गा मन्दिरलाई २२ थान पंखा, अमर ज्योतिमा १ थान कम्प्युटर, भेलनटाँडी पार्टी कार्यालयमा ७० हजार सहयोग, कोरोना पिडितलाई ६० हजारको राशन खर्च, गैंडाकोट १६ का १० वटा आमा समूहलाई १० हजारको दरले १ लाख वितरण, बालउदय स्कूललाई १ लाख सहयोग, विजय ज्योति नि.मा.वि, वडा नं १४ लाई गरि ५० हजार कुर्ची, अरोमा कलेजमा ६० हजार अक्षेरुपी, बर्थिङ सेन्टर खोल्नलाई अमरापुरी स्वास्थ्य चौकी अमरापुरी आमा समूहलाई ४० हजार, अमरापुरी स्वास्थ्य चौकीमा एमबुलेन्स खरिदका लागि २० हजार र गैंडाकोट १६ का पुर्ण सापकोटालाई उपचार खर्च २० हजार सहयोग गर्नुभएको छ ।
कार्यक्रममा विभिन्न आमा समूहका अध्यक्ष, प्रतिनिधि लगायतको उपस्थिती रहेको थियो ।