राजमार्ग विस्तारका क्रममा अप्टिकल फाइबर काटिँदा नवलपुरमा नेटवर्कको समस्या

कावासोती । राजमार्ग विस्तारका क्रममा नेपाल टेलिकमको अप्टिकल फाइबर काटिँदा दिनहुँ जसो नेटवर्कको समस्या हुन थालेको छ । नवलपरासी (बर्दघाट सुस्तापूर्व) नवलपुर क्षेत्रमा नारायणगढ – बुटवल सडक विस्तारका क्रममा पटक पटक अप्टिकल फाइबर काटिँदा नेटवर्कको समस्या भएको हो ।
बिहीबार मात्रै अरुणखोला क्षेत्रमा बाटो विस्तारका क्रममा अप्टिकल फाइबर काटिँदा दिनभर जसो नेपाल टेलिकमको मोबाइल नेटवर्कमा समस्या भएको थियो । यो समस्या नवलपुरमा अहिले पटक पटक हुन थालेको छ । मोबाइलमा फोन नलाग्ने ,बोलेको नबुझिने, नेट नचल्ने गर्दा नेपाल टेलिकमका सेवाग्राही समस्यामा परेका छन् । नेपाल टेलिकमको मोबाइल र ल्याण्ड फोन दुवैमा समस्या हुने गरेको छ ।
जिल्लाको गैँडाकोट थुम्सी देखि दाउन्ने सम्मका सेवाग्राही समस्यामा पर्दै आएका छन् । गैँडाकोट बजार क्षेत्रमा भने भरतपुरबाट सेवा प्रवाह हुने भएकाले समस्या नभएको नेपाल टेलिकम कावासोती शाखाका कार्यालय प्रमुख चन्दन कुमार झाँले बताउनुभयो ।
गैँडाकोटको बजार क्षेत्र बाहेक अन्य ठाउँमा भने बाटो विस्तारको क्रममा अप्टिकल फाइबर काँटिदा समस्या भएको उहाँले बताउनुभयो । पटक पटक बिभिन्न क्षेत्रमा तार काँटिदा समस्या बल्झिएको उहाँले बताउनुभयो । प्राविधिकहरूले तार काटिएका ठाउँमा मर्मत गरि सेवा प्रदान गर्न खटिएको भएपनि बाटो बिस्तारका क्रममा पटक पटक तार काँटिदा समस्या जटिल बन्दै गएको कार्यालय प्रमुख झाँले बताउनुभयो । बाटो विस्तारका क्रममा अप्टिकल फाइबर भएको क्षेत्रको पहिचान गरि सावधानी नअपनाउदा समेत समस्या भएको छ ।
धेरै ठाउँमा काँटिएका तारहरू मर्मत गरि सेवा प्रदान गरिएकाले कुनै पनि समय सेवा अवरुद्ध हुन सक्ने ,सेवाको गुणस्तर कम हुन सक्ने कार्यालय प्रमुख झाँले बताउनुभयो । ‘पटक पटक तार काटिएको छ, जसो तसो मर्मत गरि सेवा प्रदान गरिरहेका छौँ’ कार्यालय प्रमुख झाले भन्नुभयो –‘तारमा धेरै क्षति भएकाले सेवा कुनैपनि समय अवरुद्ध हुने, कम गुणस्तरको हुने, बोलेको नबुझिने हुने समस्या आउन सक्छ’ ।
यसअघि बिछ्याइएका नेपाल टेलिकमका तार पुरानो बाटो नजिकै रहेको र अहिले विस्तार गर्दा ति तारहरू झण्डै बाटोको बिच भागमा पर्ने अवस्था रहेको छ । यही अवस्थामा सेवा प्रदान गर्न समस्या हुने कार्यालय प्रमुख झाँले बताउनुभयो । तर नयाँ अप्टिकल फाइबर सहित व्यवस्थापनका लागि हालै केन्द्रबाट कुनै योजना नरहेको उहाँले बताउनुभयो । ‘हालै नयाँ योजना केही छैन, तर केन्द्रमा समस्याका बारेमा भन्छौ’ कार्यालय प्रमुख झाँले भन्नुभयो । बाटो बिस्तारका क्रममा पटक पटक तार काटिँदा नेपाल टेलिकमका सेवाग्राहीले लामो समय सम्म समस्या भोगिरहनुपर्ने अवस्था देखिएको छ ।