ओझेलमा धार्मिक पर्यटकीय क्षेत्र कुमारवर्ती देवी थान

यामु कुमाल । नवलपुर । धार्मिक तथा पर्यटकीय दृष्टिकोणले राम्रो सम्भावना बोकेको नवलपुरको कुमारवर्ती देवी थान मन्दिर अहिले ओझेलमा परेको छ । राज्यको सम्बन्धित निकायको दृष्टि नपुग्दा मन्दिर ओझेलमा परेको स्थानीयबासीले बताएका छन् । स्थानीय तथा प्रदेश सरकारले संरक्षण र प्रवर्द्धनमा ध्यान नदिँदा देवी थान मन्दिर क्षेत्र ओझेलमा परेको उनीहरूको गुनासो छ । मन्दिरलाई अहिले गैडाकोट नगरपालिका ११ भेडाबारीका थारू समुदायले संरक्षण गरिरहेका छन् । २०५८ सालमा देवीथान मन्दिरको निर्माण गरेर यस क्षेत्रको विकासको थालनी गरे पनि राज्यको सहयोग नहुदाँ विकासमा पछाडि परेको उनीहरूको भनाइ छ । स्थानीय थारू समुदायको पहलमा  निर्माण गरिएको मन्दिरको विकासमा  राज्यले ध्यान नदिँदा अपेक्षा गरेअनुसार मन्दिरको विकास तथा प्रचारप्रसार  गर्न नसकिएको मन्दिर व्यवस्थापन समितिका सचिव फल बहादुर महतोले बताउनु भयो ।

यस क्षेत्रमा  धार्मिक महत्वसँगै पर्यटकीय सम्भावना रहे पनि राज्यबाट विकासको कुनै पनि पहल नभएको उहाँको गुनासो छ । उक्त देवी थानमा मानिसलाई कुनै समस्या पर्दा यहाँ आएर भाकल गरी पूजापाठ गरे समाधान हुने जनविश्वास रहेको स्थानीय बासिन्दा बताउँछन् । मन्दिर संरक्षणसँगै विकासका लागि स्थानीयवासीका तर्फबाट प्रयास भए पनि राज्यको सहयोग नपाउँदा मालपुर धार्मिक क्षेत्र पछाडि परेको मन्दिर व्यवस्थापन समितिले जनाएको छ ।

ऐतिहासिक धार्मिक महत्व बोकेको क्षेत्र रहेकाले पनि यसलाई पर्यटकीय क्षेत्रका रूपमा विकास गर्नुपर्ने आवश्यकता रहेको  समितिको भनाइ छ । यस मन्दिरको दर्शन गरे मनले सोचेका इच्छाआकांक्षा पूरा हुने विश्वास रहेको स्थानीयले बताएका छन् । कुमारवर्ती देवी थान दर्शन गर्न जिल्लाका विभिन्न स्थानहरूबाट दर्शनार्थी आउने गरेको मनिदर व्यवस्थापन समितिको भनाइ छ । विशेषगरी कुमारवर्ती देवीको मन्दिरमा दर्शन गर्न आउने दर्शनार्थीले सन्तान, पशुचौपाया, धनसम्पत्ति लगायत इच्छाएको कुरा माग्दा पूरा हुने विश्वास रहेको छ । वर्षको चार पटक यस मन्दिरमा विशेष गरी पूजापाठ हुन्छ । मन्दिर प्रतिको आस्था र विश्वासबाट नै झुप्रो थानबाट पक्की देवी थानको मन्दिर स्थापना गर्न सफल भएको मन्दिर व्यवस्थापन समितिका अध्यक्ष भोज बहादुर महतोले बताउनु भयो ।

मन्दिरको जग्गाबाट वार्षिक प्राप्त हुने बजेटले पूजाआजामा मात्र ठिक्क हुने हुँदा अन्य कार्यमा बजेटको अभाव देखिएको मन्दिर व्यवस्थापन समितिले जनाएको छ ।  कुमारवर्ती देवी थान मन्दिर क्षेत्रलाई पर्यटकीय स्थलका रूपमा विकास गर्न सम्बन्धित सरोकारवाला निकायले चिन्ता र चासो नदेखाएपछि यो मन्दिर ओझेल पर्दै गएको हो । पूर्वाधारको निर्माण तथा राम्रो व्यवस्थापन गर्न सके त्यस स्थानमा  धार्मिक पर्यटकहरू भित्र्याउन सकिने प्रचुर सम्भावना रहेको स्थानीहरू बताउँछन ।