जितियाको अवसरमा मध्यविन्दु, विनयी त्रिवेणी र कावासोतीमा स्थानीय बिदा

चोरमारा । नवलपरासी पूर्व नवलपुरको विभिन्न स्थानीय तहले थारु समुदायको जितिया पर्वको अवसरमा स्थानीय बिदा दिएका छन् । नवलपुरको मध्यविन्दु नगरपालिका, विनयी त्रिवेणी गाउँपालिका र कावासोती नगरपालिकाले जितियाको अवसरमा बुधबार स्थानीय बिदा दिएका हुन् ।

मध्यविन्दु नगरपालिकामा यसअघि २०७७ चैत १९ गते जितिया पर्वको अवसरमा बिदा दिने निर्णय भएको थियो । सोही बमोजिम बुधबार नगरपालिका अन्र्तगतको सबै सरकारी कार्यालय, शैक्षिक संस्था र सार्वजिक संस्थाहरु बिदा हुने नगरपालिकाले जनाएको छ ।

विनयी त्रिवेणी गाउँपालिकामा भदौं ९ गतेको गाउँ कार्यपालिकाको बैठकको निर्णय बमोजिम स्थानीय बिदा दिइएको गाउँपालिकाका प्रमुख प्रशासकीय अधिकृत ज्योतीराज अर्यालले बताउनुभयो ।

यस्तै कावासोती नगरपालिकामा कार्य बाहक नगर प्रमुख स्तरिय निर्णयबाट बुधबारको लागि स्थानीय बिदा दिएको कावासोती नगरपालिकाले जनाएको छ । तराईको आदिबासी थारु समुदायको बसोबास रहेको नवलपुरमा जितिया पर्व विभिन्न कार्यक्रमको समेत आयोजना गरि मनाउने गरिन्छ । जिल्लाको विभिन्न स्थानमा जितियाको अवसरमा खेलकुद सहित सांस्कृतिक कार्यक्रमहरुको आयोजना गरिएको छ ।