‘कर्मचारीले सेवाको भावले काम गर्नुपर्छ ’

कावासोती । निजामती सेवा दिवसको अवसरमा कावासोतीमा वृक्षारोपण कार्यक्रम गरिएको छ । कर्मचारी मिलन केन्द्र नवलपुरको आयोजनामा कावासोती २ मा रहेको शिव सामुदायिक वन क्षेत्रको वाटिकामा वृक्षारोपण गरिएको हो ।
वृक्षारोपण पूर्व भएको कार्यक्रममा बोल्दै कार्यक्रमका प्रमुख अतिथि एवं नवलपुर जिल्ला अदालतका जिल्ला न्यायाधीश अर्जुन अधिकारीले निजामती कर्मचारीले देशको लागि केही गर्छु भनेर इमान्दारीका साथ लाग्नुपर्ने बताउनुभयो । आफ्नो भूमिका अनुसार देशको लागि सेवा गर्छु भन्ने गरि लाग्नुपर्ने बताउनुभयो । कर्मचारीले सेवाको भावले लागे सेवाको प्रभावकारिता बढ्ने साथै साख र गर्भ महसुस हुने उहाँले बताउनुभयो ।

अहिले कर्मचारीमा कार्य दक्षताको अभाव देखिएको भएपनि यसको कारण बारे भने खासै खोजी नभएको उहाँले बताउनुभयो । ‘एउटा कारण कार्यक्षमता भन्दा आरक्षणले समस्या पारेको त होइन भन्दै’ उहाँले भन्नुभयो– आरक्षण समेत क्षमता , र जसले ,जुन वर्गले  पाउनुपर्ने हो उनीहरूले नपाएका हुनकी भन्ने छ ।

कार्यक्रममा बोल्दै प्रमुख जिल्ला अधिकारी मनमाया पँगेनीले निजामती कर्मचारीले इमानदार भएर सेवालाई प्रभावकारी बनाउने गरि लाग्नुपर्नेमा जोड दिनुभयो ।

कार्यक्रममा बोल्ने अन्य कतिपय वक्ताहरूले निजामती सेवातर्फ राजनीति हावी भएको भन्दै चिन्ता व्यक्त गरेका थिए । कर्मचारी भएपछि  राजनीतिक हिसाबले जोडिन नहुनेमा जोड दिइएको थियो ।

कार्यक्रम कर्मचारी मिलन केन्द्र नवलपुरका अध्यक्ष मोहनराज काफ्लेको अध्यक्ष तथा सचिव कृष्णचन्द्र पोखरेलको सञ्चालनमा भएको थियो । कार्यक्रममा बिभिन्न कार्यालयका प्रमुख ,कर्मचारी लगायतको सहभागिता रहेको थियो ।