द्वन्द्वकालमा नवलपुरबाट बेपत्ता २१ जनाको अवस्था अझै अज्ञात

चोरमारा । नेपालको १० वर्षे द्वन्द्वको क्रममा बलपूर्वक बेपत्ता पारिएका नवलपरासी (बर्दघाट सुस्ता पूर्व)का २१ जनाको अवस्था हालसम्म पनि पत्ता लाग्न सकेको छैन । बेपत्ता भएको दुई दशक भन्दा बढी भइसक्दा पनि उनीहरूको अवस्था पत्ता लाग्न नसकेको हो ।

२०५२ सालदेखि सुरु भएको सशस्त्र द्वन्द्वको क्रममा विभिन्न समयमा बेपत्ता पारिएको २१ जना व्यक्तिहरूको अवस्था जानकारी नभएको अभिलेख बेपत्ता पारिएका व्यक्तिको छानविन आयोगमा छ । आयोगको अभिलेख अनुसार १४ जना साविक नवलपरासी जिल्लाबाटै, तीन जना काठमाण्डौबाट, दुई जना तनहुँबाट, एक जना चितवन, एक जना अर्घाखाँचीबाट बेपत्ता पारिएका थिए ।

हाल सम्म अवस्था थाहा नभएका बेपत्ता परिएका व्यक्तिहरूमा बुलिङटारका शंकर पुरी, प्रगतिनगरका टिका रानाभाट, कावासोतीका धर्मराज पराजुली, प्रगतिनगरका जानकी रानाभाट, दुम्किबासका जिबहादुर बि.क., दुम्किबासका गङ्गा के.सी., गिरुवारीका राजकुमार सुनवार, कावासोतीका होमनाथ भण्डारी, गैँडाकोटका विश्वराज बराल, कावासोतीका बिरेन्द्र के.सीं, कोल्हुवाका रुपनारायण चौधरी (थारु), गैँडाकोटका कृष्ण रिमाल, गैँडाकोटका भीमप्रसाद भट्टचन, अमांंपुरीका बलबहादुर खत्री, देउरालीका मनबहादुर परियार, गैँडाकोटका पदमबहादुर दमाईँ, प्रगतिनगरका हिमलाल काप्ले, कोटथरका इन्द्रबहादुर श्रेष्ठ, गैँडाकोटका परिक्षीत रेग्मी, देवचुलीका कृष्णप्रसाद श्रेष्ठ र देवचुलीका तोयानाथ न्यौपाने रहेका छन् ।

२०६२ मंसिर ५ गते नेपाल सरकार र द्वन्द्वरत नेकपा माओवादी बीच भएको विस्तृत शान्ति सम्झौतामा द्वन्द्वकालमा राज्य तथा विद्रोही दुवै पक्षबाट बेपत्ता परिएका व्यक्तिहरूको अवस्था ६० दिन भित्र सार्वजनिक गर्ने भन्ने उल्लेख रहेपनि हाल सम्म बेपत्ता पारिएका व्यक्तिहरूको अवस्था पत्ता नलाग्नु दुःखद भएको मानव अधिकार सञ्चालन नवलपुरका अध्यक्ष अधिवक्ता भुपेन्द्र खनालले बताउनुभयो । सम्झौताको पालना गर्न सरकारले र तत्कालीन द्वन्द्वरत पक्ष जिम्मेवार नबन्दा द्वन्द्व पीडित व्यक्तिहरू माथिको पीडा सदैव उस्तै रहेको उहाँले बताउनुभयो ।