चौधरी उद्योग ग्राममा अनुगमन / स्वास्थ्यका सबै मापदण्ड पुरा गर्न निर्देशन

कावासोती  ।  पूर्वी नवलपरासीको देवचुली नगरपालिकाको दुम्कौली स्थीत चौधरी उद्योग ग्राममा बिहीबार अनुगमन गरिएको छ ।
प्रमुख जिल्ला अधिकारी मनमाया पंगेनी , जिल्ला प्रहरी कार्यालय पुर्वी नवलपरासीका प्रमुख प्रकाश मल्ल सहितको टोलीले अनुगमन गरेको हो । कोभिड – १९ संक्रमणका समयमा उद्योगभित्र स्वास्थ्य मापदण्ड पालना नभएको भन्ने जनगुनासो आएपछि आफुहरुले उद्योगमा अनुगमन गरेको प्रजिअ पंगेनीले बताउनुभयो । टोलीले चाउचाउ र बीयर उत्पादन स्थलको अनुगमन गरेको थियो । अनुगमनका क्रममा चाउचाउ उत्पादन गर्ने ठाउँमा दुरी कायम गरेको नपाईएको तर , अन्य स्थानमा स्वास्थ्य सर्तकता अप्नाएर काम गरेको पाईएको प्रजिअ पंगेनीले जानकारी दिनुभयो । ‘हामिले जनगुनासो धेरै आएपछि उद्योगलाई कुनै जानकारी नदिकनै अनुगमन ग¥यौँ तर , बाहिर आएको जस्तो धेरै कुरा पाएनौ , चाउचाउ प्याकिङ्ग गर्ने ठाउँमा अलि भिडभाड देखियो । त्यसलाई व्यवस्थापन गर्न भनेका छौ । उद्योग प्रशाशनले प्रतिबद्धता जनाएको छ, व्यवस्थापन गर्छौ भनेर । ’ प्रजिअ पंगेनीले भन्नुभयो । भारत लगायत बाहिरबाट सामान बोकेर आउने सवारीका कारण जोखिम रहेको भन्ने गुनासो समेत आएको थियो । ‘हामिले अनुगमनका क्रममा सबै सवारीलाई सेनिटाइज गरेर मात्रै भित्र जान दिएको पायौ । तसर्थ म स्थानीयलाई धेरै त्रसित नहुन आग्रह गर्छु । महामारीका बेलामा आतङ्कीत पार्ने नभई सही सुचना दिएर संयम भएर काम गर्न समेत आग्रह गर्छु । ’ प्रजिअ पंगेनीले जिल्लाका सबै उद्योगहरुको अनुगमन गरिने समेत बताउनुभएको छ । संक्रमणको दर दिनानुदिन बढ्दै गएको र उद्योग कलकारखानामा जोखिम झनै बढी हुने हुँदा सर्तकता अप्नाउन आवश्यक रहेको उहाँले बताउनुभयो । अनुगमन नगर्ने हो भने लापरवाही समेत हुन सक्ने भएको हुँदा अनुगमनलाई निरन्तरता दिने उहाँले बताउनुभयो ।

चौधरी उद्योगग्राममा अहिले करीब २ हजार जना कामदारले काम गर्दै आएका छन् । मासमा काम गरेर समुदायमा घुलमिल हुँदा जोखिम बढ्ने सक्ने भन्दै यहाँका स्थानीयले गुनासो गर्दै आएका छन् ।
उद्योगका सिनियर जि.एम. रामभक्त केसीले धेरै संख्यामा कामदार रहेपनि कोभिड – १९ संक्रमणको जोखिमलाई मध्यनजर गर्दै स्वास्थ्य सर्तकता अप्नाउदै दुई सिफ्टमा काम भईरहेको जानकारी दिनुभयो । उहाँले सिफ्ट परिवर्तन हुँदा भिडभाड हुने भएकाले पन्ध्रदेखि बीस मिनेट फरक पारेर सिफ्ट परिवर्तन गरेको बताउनुभयो । टाढाका कामदारलाई उद्योग आफैँले सवारीको व्यवस्था गरेको र नजिकका कामदारलाई साईकलमै एक जना मात्रै आउन जान निर्देशन गरेको उहाँको भनाई छ । कामदारलाई ल्याउँदा छोड्दा थर्मल गनले ज्वरो नाप्ने , सेनिटाइजरको प्रयोग गर्ने र मास्कको अनिवार्य प्रयोग गर्न भनिएको उहाँले बताउनुभयो । उद्योगभित्र समेत यी सावधानी अप्नाईएको उहाँले बताउनुभयो । साथै यदि कोहि संक्रमित भईहालेमा आइसोलेन समेत तयारी अवस्थामा राखिएको उहाँले बताउनुभयो । उद्योगभित्रै ७० वेडको आइसोलेन तयारी राखिएको र आवश्यक परेमा अक्सिजन समेत तुरुन्तै व्यवस्थापन गर्न सकिने उहाँको भनाई छ ।
जिल्लामा निषेधाज्ञा भर्खर जारी भएकाले कामदारको व्यवस्थापन गर्नेक्रममा रहेको हुँदा केही कमजोरी देखिएपनि , अनुगमन टोलीले निर्देशन गरे अनुसार भौतिक दुरी कायम राख्ने काम पनि व्यवस्थापन गर्ने उहाँले बताउनुभयो ।