आकासमा धुवाँको बादल, आँखा पोल्ने समस्या

नवलपुर । नवलपुरका बिभिन्न सामुदायिक वनमा लागेको आगोले यसक्षेत्रको वायुमण्डल धुँवाले ढाकेको छ । जिल्लाको सबै जसो क्षेत्रमा अहिले धुँवाको बादल लागेको छ । यहाँ रहेका सामुदायिक वनहरुमा लागेको आगोले वायुमण्डल धुँवाले ढाकेको हो ।
नवलपुरका अहिले करिब २ हजार हेक्टर वन क्षेत्रमा डढेलो लागेको डिभिजन वन कार्यालय नवलपुरका सूचना अधिकारी शिव श्रेष्ठले बताउनुभयो । जिल्लाका बिभिन्न सामुदायिक वन क्षेत्रमा अहिले पनि ढडेलो लागेको भन्ने सूचना आईरहेकाले डढेलो लागेको वनको क्षेत्रफल बढ्न सक्ने सूचना अधिकारी श्रेष्ठले बताउनुभयो ।
गत वर्ष नवलपुरमा ६०० हेक्टर क्षेत्रफलमा मात्रै डढेलो लागेकोमा यो समय चैतको दोश्रो हप्ता भित्रमानै दुई हजार हेक्टर बढी क्षेत्रफलमा डढेलो लागेको उहाँले बताउनुभयो ।

नवलपुरको राजमार्ग क्षेत्रका सामुदायिक वनहरुमा धेरै डढेलो लागेको छ । सूचना अधिकारी श्रेष्ठका अनुसार राजमार्ग आसपासका क्षेत्रमा चुरोट खाएर फालीदिने गर्दा धेरै वनमा आगोलागि भएको छ । यस्तै सामुदायिक वनसंग बिभिन्न कारणले मनमुटाव रहेका व्यक्तिले रिसले समेत आगो लगाएको पाईएको उहाँले बताउनुभयो । वन्यजन्तुको शिकार गर्न आगो लगाउने गरेको सूचना अधिकारी श्रेष्ठले बताउनुभयो ।कतिपयले वनमा आगो लगाउदा पछी च्याउ राम्रो आउछ भनेर समेत डढेलो लगाउने गरेको उहाँले बताउनुभयो । पहिले पहिले खोरीया फाड्न वनमा आगो लगाउन चलन भएपनी नवलपुरमा अहिले भने यस्तो नरहेको उहाँले बताउनुभयो ।
नवलपुरमा करिब ७० हजार ४ सय हेक्टर क्षेत्रफलमा वन रहेको छ । नवलपुरमा २०८ वटा सामुदायिक वन ,१५३ वटा कतुलियती वन , ८ वटा धार्मिक वन, साझेदारी र चक्ला वन एक – एक वटा रहेको छ । अहिले धेरै जसो वनहरुमा ढडेलो लागेको छ । पहाडी क्षेत्रमा लागेको आगो नियन्त्रण गर्न मुस्कील देखिएको छ । अफ्ठ्यारो स्थानमा लागेको आगो निभाउन असम्भव जस्तै देखिएकाले तत्काल नियन्त्रणमा आउन सक्ने सम्भावन देखीएको छैन । सामुदायिक वन क्षेत्रमा लागेको आगो नियन्त्रणकालागि वन समूहले प्रयास गरेपनी ढडेलोबाट वन जोगाउन भने सकेका छैनन् । अघिल्ला वर्षहरुमा भन्दा यस वर्ष यहाँका सामुदायिक वनहरुले डढेलो नियन्त्रणकालागि प्रभावकारी रुपमा काम नगरेको देखिएको छ ।

वैज्ञानिक वन व्यवस्थापन प्रणाली खारेजी, काठ दाउरा उपभोगमा लामो समय गरिएको प्रतिवन्धका कारण उपभोक्ताहरुमा नैरश्यता देखिएको वैज्ञानिक वन सञ्जाल नवलपुरका अध्यक्ष मधुविलास अधिकारीले बताउनुभयो । यसै कारणले समेत संरक्षणमा उपभोक्ताको चासो कम भएको अनुमान गरिएको छ । जिल्लाका विभिन्न वन क्षेत्रमा लागेको डढेलोले आकाशमा धुँवाले ढाक्दा आँखा पोल्ने समस्य समेत देखिएको छ । धुँवाका कारण आँखा पोल्ने ,स्वास प्रस्वासमा समेत समस्या उत्पन्नहुन सक्ने मध्यविन्दु जिल्ला अस्पतालका जन स्वास्थ्य अधिकृत छविलाल सुवेदीले बताउनुभयो । यसकालागि आँखाको सुरक्षाका लागि चस्मा प्रयोग गर्ने, बेलाबेलामा चिसोपानीले आँखा धुने गर्ने र स्वास प्रस्वासमा समस्या हुन नदिन मास्क लगाउने जस्ता उपाए अपनाउन सकिने उहाँले बताउनुभयो ।

(यो समाचार अनुमती बिना साभार गरि कुनै पनि माध्यमबाट प्रयोग गरेको पाईएमा कानून अनुसार कार्वाही प्रक्रियामा जान बाध्य हुने छौं ।)