नवलपुर दुर्घटना अपडेट: मृत्यु हुनेको संख्या सात पुग्यो, ६ जनाको पहिचान खुल्यो

नवलपुर । नवलपुरको देवचुली नगरपालिका–९,मा आज बिहान भएको जिप दुर्घटनामा मृत्यु हुनेको संख्या ७ पुगेको छ । दुर्घटनामा परि गम्भिर घाइते नवलपुरको मध्यविन्दु नगरपालिका –२ मदनपुर बस्ने १८ वर्षिय चिरन अर्यालको उपचारका क्रममा पुनारो मेडिकल कलेज भरतपुरमा मृत्यु भएको जिल्ला प्रहरी कार्यालय नवलपरासी पूर्व नवलपुरका प्रहरी नायव उपरीक्षक वेदबहादुर पौडेलले बताउनुभयो ।
यसै गरि दुर्घटनामा परि घटना स्थलमै मृत्यु हुने अन्य ६ जना मध्य पाँच जनाको पहिचान खुलेको छ । प्रहरी नायव उपरीक्षक पौडेलका अनुसार मृत्युहुनेमा जिप चालक जिल्लाको बौदिकाली गाउँपालिका –६, माझडाँडा बस्ने छन बहादुर आले , सोही वडाको लाहपे बस्ने ५२ वर्षीय कुमारी राना, माझडाँडाकै ५६ वर्षीय टेकमान वानटक्की र बुलिङटार गाउँपालिका –४, चुलिबोझा बस्ने १२ वर्षीय करिश्मा ठाडा र सोही ठाउँ बस्ने अन्दाजी ४५ वर्षीय कमला वानटक्की रहेकाछन् । मृत्युहुने थप एक जनाको अझै पहिचान खुल्न नसकेको प्रहरी नायव उपरीक्षक पौडेलले बताउनुभयो । जिपमा सात जना सवार रहेकोमा सबैजनाको मृत्यु भएको हो ।
आज बिहान जिल्लाको पहाडी क्षेत्र बौदिकाली गाउँपालिकाबाट दलदलेका लागि छुटेको लु १ ज ३२७० नम्बरको यात्रु बाहक जिप देवचुली नगरपालिका स्थित भित्रिसडक खण्डमा आफै अनियन्त्रीत भएर दुर्घटनामा परेको थियो ।