नवलपुरकाे विकासका विषयमा प्रधानमन्त्री समक्ष जिल्लाकाे टाेलीद्वारा ध्यानाकर्षण

नवलपुर । नवलपुरकाे विभिन्न विकासका विषयमा जिल्लाकाे टाेलीद्वारा प्रधानमन्त्री समक्ष ध्यानाकर्षण गराएको छ। जिल्ला समन्वय समिति नवलपुरकाे समन्वयमा सांसद ,पालिकाका जनप्रतिनिधि ,जिल्ला स्थिति राजनीतिक दलका प्रतिनिधि लगायतको उपस्थितिमा प्रधानमन्त्री समक्ष जिल्लाकाे विकासका सवालमा ध्यानाकर्षण गराइएको जिल्ला समन्वय समिति नवलपुरका प्रमुख बाबुराम विश्वकर्माले बताउनुभयो । जिल्लामा विभिन्न याेजना तथा बजेट सुनिश्चितताकाे माग गरिएको हाे ।
नमूना सदरमुकामकाे काम अघि बढ्न नसकेको र गत वर्षको वजेट समेत फ्रिज भएको हुदाँ उक्त कार्यलाई तत्काल अगाडि बढाउनका लागि कार्यक्रममा समावेश गरी आवश्यक बजेट सुनिश्चितता सहित व्यवस्था गरिदिन ध्यानाकर्षण गराइएको प्रमुख विश्वकर्माले बताउनुभयो ।
याे सहित नवलपरासी (ब.सु.पू. / जिल्लाको गण्डकी प्रदेश राजधानी जोड्ने पहाडी मार्गलाई छिटो सम्पन्न गर्न जोड दिनु पर्ने । जिल्लाको नमुना सदरमुकाम हुँदै बग्ने केरुङ्गे खहरे खोला लगायत जिल्लामा अवस्थित अन्य खोलाहरु मानव वस्ती भन्दा माथी भएकाले सो बाट निकट भविष्यमा कावासोती बजार र अन्य क्षेत्रमा पर्न सक्ने जोखिमलाई ध्यान दिँदै खोला व्यवस्थापनका लागि बजेटको व्यवस्था गर्नुपर्ने । नवलपरासी (ब.सु.पू.) जिल्लामा पर्ने नेपालकै सबैभन्दा ठूलो धाैवादी फलाम खानी संचालनमा ल्याउन आवश्यक बजेट व्यवस्था गर्नुपर्ने ।नवलपरासी वर्दघाट सुस्ता पूर्व जिल्लाको नाम परिवर्तन गरि नवलपुर जिल्ला नामाकरण गर्नु पर्ने । दुम्कीबासबाट त्रिवेणी जोडने सडकलाइ तत्काल संचालनमा ल्याउनु पर्ने । प्रदेश औद्योगिक क्षेत्र लोकाहाको कार्य अगाडी बढाउनु पर्ने विषयमा टाेलीले ध्यानाकर्षण गराएको छ।
यसै गरि त्रिवेणी भन्सार कार्यालयको व्यवस्थापन गर्नुपर्ने ।सुकुम्वासी तथा अव्यवस्थित वसोवासी व्यवस्थापन गर्ने काम छिटो गर्नुपर्ने , यस वर्षको विनियोजित बजेटवाट अत्यावश्यक सेवा प्रवाह हुने कार्यालयहरु तत्काल निर्माण सुरु गर्नुपर्ने र कालीगण्डकी अन्तर्गत नदीजन्य पदार्थ निकास रोकिएको सम्बन्धमा ध्यानाकर्षण गराइएको छ।
जिल्ला समन्वयको संयाेजनमा पुगेको टाेलीमा संघीय सांसद डा. शशांक काेइराला,प्रदेश सांसद राेशन बहादुर गाहा, दमयन्ती रूचाल, देवचुलीका नगर प्रमुख हरिप्रसाद न्याैपाने, गैंडाकोटका मेयर मदन भक्त अधिकारी , विनयी त्रिवेणीका अध्यक्ष घनश्याम गिरी, माओवादी केन्द्रका नेता किसन शर्मा लगायत विभिन्न राजनीति दलका व्यक्तिको सहभागीता रहेको थियाे।
भेटमा प्रधानमन्त्री पुष्पकमल दाहाल प्रचण्डले नवलपुरकाे भूगोलका विषयमा आफू जानकार रहेको र उठाएका विषय सम्बाेधनका लागि पहल गर्ने बताउनुभयो ।