नवलपुर । किसानका विभिन्न समस्या समाधानको माग राख्दै अखिल नेपाल किसान महासंघ नवलपुरले सरकारको ध्यानाकर्षण गरेको छ । किसानहरू सधैँ समस्यामा पर्ने गरेको र सरकारले किसानका समस्या तत्काल समाधानका लागि कुनै पहल नगरेको भन्दै समस्या समाधानका लागि प्रमुख जिल्ला अधिकारी मार्फत नेपाल सरकार प्रधानमन्त्री कार्यालयलाई ज्ञापन पत्र बुझाइएको अखिल नेपाल किसान महासङ्घका स्थायी कमिटी सदस्य एवं जिल्ला इन्चार्ज विन्दा गैरेले बताउनुभयो । 
पशुमा लम्कि स्किनको प्रकोपले किसानले ठूलो क्षति बेहोर्नुपरेको , पशु बिमाको क्षतिपूर्ति पाउन नसकेको लगायतका विभिन्न समस्याहरू रहेकाले आफूहरूले किसानका समस्या तत्काल समाधानका लागि नेपाल सरकारलाई ध्यानाकर्षण गराउन ज्ञापन पत्र बुझाएको अखिल नेपाल किसान महासंघ नवलपुरका अध्यक्ष पूर्णप्रसाद सुवेदीले बताउनुभयो । 
हाल नेपाल भरी देखिएको पशुरोग लम्पी स्कीन रोग तुरुन्त रोकथाम गरि पशु धनका लागी गरिएको पशु बिमा क्षतिपूर्ति अविलम्ब उपलब्ध गराउन, रासायनिक मलको आपूर्ति सहजिकरण गराउन, कृषि उद्यमीहरू र साना किसानलाई लक्षित गरि कृषि विकास बैंकबाट सहुलियत र दरमा कृषि ऋण उपलब्ध गराउन किसान महासंघले ज्ञापनपत्र मार्फत नेपाल सरकारसँग माग गरेको छ । 
यसैगरी प्रत्येक पशुपालक मत्छ्य पालक, कुखुरापालकका लागी भेटनरी ल्याब प्रविधिको ब्यवस्था गरी समस्या पहिचान गर्दै समस्याको निराकरण गर्न, कृषकबाट उत्पादित कृषि उपजहरूको बजार व्यवस्थापन तथा उचित व्यवस्थापन गर्न, संघीय सरकार, प्रदेश सरकार तथा स्थानीय सरकारबाट सञ्चालित कालिमाटी सहितको देश भरिका सटर तथा स्टलहरू कृषक हितमा प्रयोग हुने गरी खुला प्रतिस्पर्धात्मक तरिकाबाट भाडा दिने ब्यवस्था मिलाउन , कृषक सुचिकरण तथा किसान कार्डको व्यवस्था गर्न, कृषक प्रोत्साहन कार्यक्रम अन्तर्गत कृषक पेन्सनको व्यवस्था गर्न समेत किसान महासङ्घले माग गरको छ ।
ज्ञापनपत्र मार्फत स्थानीय प्रदेश तथा संघीय सरकारबाट वृद्धि गरेको कर अविलम्ब छुट गर्न र पालिकाका प्रत्येक वडाहरूमा उत्पादन क्षमताको आधारमा कोल्ड स्टोरको व्यवस्थापन गर्न, भारत तथा अन्य देशबाट आयातित कृषि उपजहरूको विषादी मापन ल्याबमा चेक जाँच गर्दै अखाद्य वस्तुमा प्रतिबन्ध लगाउन समेत माग गरिएको छ । 
प्रमुख जिल्ला अधिकारी मार्फत प्रधानमन्त्री कार्यालयलाई ज्ञापन पत्र बुझाउने कार्यक्रममा अखिल नेपाल किसान महासङ्घका केन्द्रिय स्थायी कमिटी सदस्य, जिल्ला अध्यक्ष, कोषाध्यक्ष, विभिन्न पदाधिकारी सहित सदस्य लगायतको सहभागिता रहेको थियो । 
