नवलपुर। नवलपरासी पूर्व नवलपुरमा चालु आर्थिक वर्षमा मागको ५० प्रतिशत मात्रै रासायनिकमल आएको छ । जिल्लामा करिब २ हजार मेट्रिकटन रासायनिकमल युरिया आवश्यक रहेको भएपनि चालु आर्थिक वर्षमा करिब एक हजार मेट्रिकटन मल आएको कृषि सामाग्री कम्पनी लिमिटेड कावासोतीका शाखा प्रबन्धक सगुन तिवारीले बताउनुभयो ।
जिल्लामा डिएपी र पोटासका लागि खासै समस्या नभएपनि युरिया मलको भने आवश्यकता अनुसार आपूर्ति हुन सकेको छैन । धान रोपाइँँँको समयमा मलको समस्या नहोस् भनेर हालै मात्र ८४ टन डिएपी, ६३ टन युरिया जिल्लामा आएको शाखा प्रबन्धक तिवारीले बताउनुभयो । अहिले नवलपुरका लागि १ सय १६ दशमलब ६ मेट्रिकटन डिएपी र १ सय ५ मेट्रिक टन युरिया कोटा निर्धारण गरिएकोमा केही अझै आउन बाँकी रहेको शाखा प्रबन्धक तिवारीले बताउनुभयो ।
कृषि सामाग्रीको डिपोमा आएको मल कृषि ज्ञान केन्द्र, पालिकाका प्रतिनिधिको रोहबरमा आवश्यकता अनुसार हरेक पालिकालाई कोटा निर्धारण गर्ने र पालिका स्थित सूचिकृत कृषि सहकारीबाट किसानलाई बितरण गर्ने गरिएको छ । पर्याप्त मल जिल्लामा नआउँदा किसानले भने समस्या झेल्दै आएका छन् । अहिले पनि आवश्यकता अनुसार मल पाउन मुस्किल भएको कावासोतीका कृषक खेमप्रसाद लुइटेलले बताउनुभयो । नवलपुरमा कृषि सामाग्री कम्पनी लिमिटेड सहित साल ट्रेडिङले रासायनिकमलको आपूर्ति गर्दै आएका छन् ।
