नवलपुर । गण्डकी प्रदेशका मुख्यमन्त्री खगराज अधिकारीले आफूहरूले कालिगण्डकी डाइभर्सन हुन नदिन बताउनुभएको छ । नवलपरासी (बर्दघाट सुस्तापूर्व) नवलपुरको कावासोतीमा सञ्चालित मिसन ग्रास रुट अभियानमा आफ्नो भनाई राख्दै मुख्यमन्त्री अधिकारीले धार्मिक आस्था जोडिएका, मानव धर्म संस्कृतिसँग जोडिएका तीर्थ स्थलहरू र यस वरपरका फाँटहरू हिउँदमा सुख्खा हुन भएकाले कालिगण्डकी डाइभर्सन हुन नदिने बताउनुभयो । ‘कालिगण्डकी धार्मिक आस्था र मानव धर्म संस्कृतिसँग जोडिएको छ, डाइभर्सनले नदि बेसीका फाँटहरू सुख्खा हुन्छन ’मुख्यमन्त्री अधिकारीले भन्नुभयो ‘यसकारण हामी कालिगण्डकी डाइभर्सन हुन दिन्नौ।’
कार्यक्रममा बोल्दै त्रिवेणी देखि कोरलासम्म सडक आवागमन गर्न नसके गण्डकी प्रदेशको औचित्यमाथि प्रश्न खडा हुने समेत बताउनुभएको छ । त्रिवेणी – कोरोला सडक प्रदेशकै महत्वपूर्ण सडक भएको बताउँदै दुम्किबास – त्रिवेणी खण्डमा सडक खोल्न बाँकी रहेकाले यो सडक नखोल्दा प्रदेशको औचित्य माथीनै प्रश्न खडा हुने उहाँले बताउनुभयो ।
त्रिवेणी –दुम्किबास खण्डमा सडक निर्माणका लागि प्रदेश तयार रहेको र स्रोत सुनिश्चित गरि अघि बढ्ने उहाँले बताउनुभयो । निकुञ्जका कारण केही समस्या देखिएकाले वातावरणीय प्रभाव अध्ययनले सुझाए अनुसारको काम गर्न आफूहरू तयार रहेको समेत मुख्यमन्त्री अधिकारीले बताउनुभयो । भारत र चिनलाई जोड्ने त्रिवेणी –कोरला सडक सबैभन्दा छोटो दुरीको सडक भएकाले समेत यसको महत्व थप रहेको बताउँदै त्रिवेणी–दुम्किबास सडक खण्ड खोल्न आवश्यक प्रक्रिया अघि बढेको उहाँले बताउनुभयो ।
उहाँले संविधानमै गण्डकी प्रदेशको सिमा बर्दघाट सुस्ता पूर्व भनिएकाले बर्दघाट र सुस्ता गण्डकी प्रदेशमा हुनुपर्ने समेत बताउनुभयो । बर्दघाट र सुस्ता हाल लुम्बिनी प्रदेशमा राखिएकाले यो गण्डकी प्रदेशको भूगोल भएको उहाँले बताउनुभयो । संविधान मिचिएकाले यसका विरुद्ध आफूहरू कानूनी प्रक्रिया जान समेत तयार रहेको मुख्यमन्त्री अधिकारीले बताउनुभयो ।
