‘ शुद्ध र स्वच्छ पानी उपभोक्तासम्म पुर्याउन प्रतिवद्ध छौं’

कावासोती । कावासोती खानेपानी तथा सरसफाइ उपभोक्ता संस्था अन्र्तगत नव गठित खानेपानी सुरक्षा योजना टोलीको पहिलो बैठक आज बसेको छ । खानेपानी सुरक्षा योजना टोलीका संयोजक एवं संस्थाका सचिव ज्ञानेन्द्र न्यौपानेको अध्यक्षता तथा संस्थाका अध्यक्ष दिपकराज लम्सालको प्रमुख आतिथ्यमा खानेपानी सुरक्षा योजना टोलीको पहिलो बैठक बसेको हो ।

बैठकमा बोल्दै संस्थाका अध्यक्ष दिपकराज लम्सालले कावासोती खानेपानी संस्था मार्फत स्वच्छ, पानी हरेक उपभोक्ता सम्म पुर्याउन आफूहरू प्रतिवद्ध रहेको बताउनुभयो । उहाँले मुहान देखि उपभोक्ताको धारासम्म शुद्ध र स्वच्छ पानी पुर्याउनका लागि संस्था नियमित रुपमा लागेको बताउनुभयो । ‘पानी वितरणलाई प्रभावकारी बनाउने एउटा पाटो रह्यो ,हामी स्वच्छ र शुद्ध पानी उपभोक्ता समक्ष पुर्याउन संस्थागत रुपमा लागि रहेका छौं ’ बैठकमा आफ्नो भनाई राख्ने क्रममा उहाँले भन्नुभयो । खानेपानी सुरक्षाका लागि विभिन्न योजना बनाउँदै संस्था अघि बढेको उहाँले बताउनुभयो । पानी शुद्धीकरणका लागि थप विभिन्न योजना हाल कार्यान्वयनको चरणमा रहेको समेत उहाँले बताउनुभयो ।

पानी वितरणका समयमा विभिन्न खालका समस्या आउने गरेको भएपनि त्यसलाई तत्काल हल गर्ने गरि काम हुने गरेको उहाँको भनाई थियो । अहिले पूर्व पश्चिम राजमार्ग विस्तारका क्रममा राजमार्ग क्षेत्रमा पानी वितरणमा समस्या भएको बताउँदै यो समस्या चाडै हल हुने समेत अध्यक्ष लम्सालले बताउनुभयो । राजमार्ग क्षेत्रमा नयाँ पाइप जडान गरि पानी वितरणको कार्य थालनी गर्ने क्रममा रहेकाले वितरण प्रणालीमा केही समस्या उत्पन्न भएपनि प्राविधिक टोली ति समस्या समाधानका लागि निरन्तर रुपमा लागेको र चाडै समस्या समाधान हुने उहाँले बताउनुभयो ।

खानेपानी सुरक्षा योजना टोलीका संयोजक एवं संस्थाका सचिव ज्ञानेन्द्र न्यौपानेले टोलीले वार्षिक रुपमा खानेपानी सुरक्षा सम्बन्धी योजना निर्माण गरि आफ्नो क्षेत्रमा कार्य गर्ने बताउनुभयो । सत्र  सदस्यीय खानेपानी सुरक्षा योजना टोलीमा गठन भएको छ । सबैको साथ र योजनाबाट खानेपानीलाई मुहान देखि उपभोक्ताको धारा सम्म थप सुरक्षित बनाउन सहयोग मिल्ने टोलीका संयोजक  न्यौपानेले बताउनुभयो ।

पहिलो बैठकमा संस्थाका उपाध्यक्ष, कोषाध्यक्ष, वडा प्रतिनिधि सदस्य , संस्थाका कर्मचारी सहित टोलीका सदस्यहरूको सहभागिता रहेको थियो । बैठकमा सहभागीहरूले खानेपानी सुरक्षा सम्बन्धी आफ्नो आफ्नो सुझाव राखेका थिए । खानेपानीलाई सुरक्षित बनाउने र उपभोक्तामा शुध्द तथा स्वच्छ पानीको उपलब्धताका लागि आफ्नो स्थानबाट लाग्ने टोलीका सदस्यहरुले प्रतिवद्धता समेत व्यक्त गरेका थिए ।