कावासोती । भूमिसम्बन्धी समस्या समाधानका लागि जिल्ला समन्वय समिति नवलपुरमा छलफल भएको छ । भूमिहीन, सुकुम्बासीलाई छिटो लालपुर्जा दिने विषयमा जिसस प्रमुख बाबुराम विश्वकर्मा, कावासोती नगरपालिका नगर प्रमुख विष्णुप्रसाद भुसाल, भूमि सम्बन्धी समस्या समाधान आयोग नवलपुरका अध्यक्ष तारापति खरेल, जिसस उप प्रमुख शकुन्तला लम्साल सहितको उपस्थितमा छलफल भएको हो ।
जिल्लाका सबै पालिकामा भूमि सम्बन्धी समस्या समाधानका लागि हाल सम्म भएका कामको अवस्था र अब पुर्जा वितरणका लागि के कस्ता कार्यहरू गर्न बाँकी रहेको छ र कसरी अघि बढाउने भन्ने विषयमा बैठकमा छलफल भएको जिल्ला समन्वय समिति नवलपुरका प्रमुख बाबुराम विश्वकर्माले बताउनुभयो ।
भूमि सम्बन्धी समस्याका कारण धेरै नागरिक दुखदायी अवस्थामा रहेकाले सो समस्या चाँडै समाधान होस भन्न छलफल केन्द्रित रहेको थियो । र सोका लागि कुन निकायले के कार्य गर्नुपर्ने भन्ने विषयमा केन्द्रित रहेर छलफल गरिएको जिसस प्रमुख विश्वकर्माले बताउनुभयो । खास गरि कावासोतीमा समेत भूमिहीन ,सुकुम्बासी र अव्यवस्थित बसोवासीको संख्या उल्लेख्य रहेकाले यहाँको सबै समस्या समाधान गरि भूमिहीन, सुकुम्बासीलाई पुर्जा बितरण गर्न थप काम अघि बढाउने बारेमा बैठकमा छलफल भएको उहाँले बताउनुभयो । सबै पालिकामा आवश्यक प्रक्रिया अघि बढाउने र आयोगबाट पनि समस्या समाधानका लागि निरन्तर काम गर्नुपर्ने जिसस प्रमुख विश्वकर्माले बताउनुभयो । यसका लागि जिल्ला समन्वयका तर्फबाट गर्नुपर्ने आवश्यक समन्वय गर्न आफूहरू तयार रहेको सो क्रममा उहाँले बताउनुभएको थियो ।
जिल्लाका सबै पालिका मध्य कावासोती नगरपालिकामा भूमि सम्बन्धी समस्या समाधानका लागि धेरै काम भएको छ । केही वडाको नापीका सबै काम सकिएकाले पुर्जा दिने प्रक्रियामा रहेकाले अब थप प्रक्रिया अघि बढाइने कावासोती नगर प्रमुख विष्णुप्रसाद भुसालले बताउनुभयो । नगरपालिका भित्र भूमिका विविध खालका समस्या रहेकोमा क्रमश नापीका काम सकिएका वडाबाट पुर्जा दिन सकिने नगरप्रमुख भुसालले बताउनुभयो । नापीको काम बाँकी रहेका वडामा समेत प्रक्रियागत रुपमा काम अघि बढाइने उहाँले बताउनुभयो । कावासोती ३ र ५ मा आयोगको समन्वयमा थप काम शुरु गर्न सके चाडै पुर्जा दिन सकिने सो क्रममा नगर प्रमुख भुसालले बताउनुभयो ।
भूमि सम्बन्धी समस्या समाधान आयोगका जिल्ला अध्यक्ष तारापति खरेलले जिल्ला तहबाट आफूहरूले गर्ने कामका लागि कुनै समस्या नरहेको बताउनुभयो । देखिएका समस्या जिल्लाबाट सम्बोधन हुने भए आफूहरूले गर्ने र यहाँबाट नहुने विषय केन्द्रमा पठाइने अध्यक्ष खरेलले बताउनुभयो । कामको प्रगतिका हिसाबमा कावासोतीमा धेरै काम अघि बढेकाले जिल्लामा सबै पालिका भन्दा पहिले यहीबाट पुर्जा दिन सकिने अवस्था रहेको उहाँले बताउनुभयो ।
आज भएको छलफल कार्यक्रममा जिसस उप प्रमुख शकुन्तला लम्साल, आयोगका जिल्ला सदस्य राम बहादुर ब्लोन, जिसस सदस्यहरू लगायतको उपस्थिति रहेको थियो ।
