कावासोती । असल छिमेकी नेपालको आयोजनामा सञ्चालित दुई दिने सर्च एण्ड रेस्क्यु तालिम सम्पन्न भएको छ ।
कावासोती नगरपालिका १७ अमलटारीमा मंगलबार र बुधबार दुई दिन तालिम भएको थियो ।
कावासोती वडा नं। १५ र १७ , मध्यविन्दु नगरपालिका वडा नं। २ र ५ का बाढी प्रभावित क्षेत्रका २० जनालाई तालिम प्रदान गरिएको हो ।
विपदको समयमा स्थानीय श्रोत साधनको प्रयोग गरी विपद न्यूनिकरण गर्न सहयोग होस् भन्ने उद्देश्यले तालिम आयोजना गरिएको असल छिमेकी नेपालका कार्यक्रम अधिकृत पुरन सोतीले बताउनुभयो ।
यस्तै विपदको अवस्थामा उद्धार कसरी गर्ने राहत र सहयोगका लागि के कस्ता काम गर्ने र को कसले सहयोग गर्छ , कसरी पहल गर्ने भन्ने बारेमा जानकारी प्रदान गर्न पनि तालिमले सहयोग पुग्ने सोतीले बताउनुभयो । जलवायु परिवर्तनको बारेमा जानकारी सँगै विपद सचेतना र क्षमता अभिवृद्धिका लागि तालिम आयोजना गरिएको सोतीले जानकारी दिनुभयो ।
तालिममा रेडक्रस सोसाइटी नवलपुरका कार्यक्रम अधिकृत प्रकाश कार्की , र फिल्ड सुपरभाइजर प्रविण सुवेदीले सहजीकरण गर्नुभएको थियो ।
तालिमको एक औपचारिक कार्यक्रमका बीच समापन गरिएको छ । असल छिमेकी नेपालका कार्यक्रम अधिकृत पुरन सोतीको अध्यक्षता र कावासोती १७ का अध्यक्ष चुडामणि थनेतको प्रमुख आतिथ्यमामा समापन कार्यक्रम भएको हो ।
