पिकनिकसँगै पर्यटनको गन्तव्य बन्दै देवचुलीको ‘घुमाउरी’

देवचुली । नवलपरासी ( बर्दघाट सुस्तापूर्व ) नवलपुरको देवचुली नगरपालिकामा अवस्थित घुमाउरी पिकनिकसँगै पर्यटनको गन्तव्य बनेको छ । देवचुली नगरपालिका –९, मा रहेको घुमाउरी सामुदायिक वन क्षेत्र स्थित घुमाउरी बनभोज स्थल आन्तरिक तथा वाह्य पर्यटकको लागि गन्तव्यसँगै बनभोज स्थलको रुपमा विकास भएको छ ।
शनिबार मात्रै जिल्ला सहित जिल्ला बाहिरका गरि करिब ५० वटा समूह घुमाउरी अवलोकन सहित बनभोजका लागि आएको घुमाउरी सामुदायिक वनका अध्यक्ष दीपक भट्टराईले बताउनुभयो । जिल्लका विभिन्न क्षेत्र सहित चितवन , रुपन्देही लगायतका क्षेत्रबाट यहाँ घुमफिर, रमाइलो सहित बनभोज खान समूहहरू आउने गरेको उहाँले बताउनुभयो । ‘पछिल्लो समय यहाँ आउनेको संख्या बढेको छ, जिल्ला सहित जिल्ला बाहिरबाट समेत अवलोकन र बनभोज खान समूह आउने गरेकाछन् ’ अध्यक्ष भट्टराईले भन्नुभयो ।

वन क्षेत्रमा बनभोज स्थल निर्माण सहित पर्यटकीय गन्तव्य बनाउन वनमार्फत पहल भएकोमा हाल यसले सार्थकता पाएको उहाँले बताउनुभयो । अहिले घुमाउरीमा बिदाको दिन करिब ४५ ÷५० समूह र अन्य दिन करिब २० समूह बनभोज खान ,घुमाउरीको अवलोकन सहित रमाइलोका लागि आउने गरेको अध्यक्ष भट्टराईले बताउनुभयो ।
पहाडी काख र हरियाली वन क्षेत्र आफैमा रमणीय भएकाले यहाँ आन्तरिक सहित बाह्य पर्यटकको आकर्षण बढ्दो रहेको छ । पूर्व पश्चिम राजमार्गको प्रगतिनगरबाट करिब ४ किलोमिटरको दूरीमा रहेको घुमाउरीलाई पर्यटकीय स्थल तथा बनभोज स्थलका रुपमा विकासका लागि वन मार्फत ठूलो पहल भएको छ । घुमाउरी सामुदायिक वनले हाल सम्म करिब रु. ७८ लाख लगानी गरि आवश्यक संरचना र पूर्वाधार निर्माण गरेको अध्यक्ष भट्टराईले बताउनुभयो । घुमाउरी सम्म जाने बाटो, विश्राम स्थल, पार्क, पानी फ्याँक्ने फोहरा, टहरा लगायतका संरचना निर्माण गरिएको उहाँले बताउनुभयो ।
घुमाउरीको विकासका लागि खानेपानी सुविधा पुर्याउन संघ सरकारबाट रु. १५ लाख सहयोग भएको उहाँले बताउनुभयो । चालु आर्थिक वर्षमा गण्डकी प्रदेश सरकारबाट यहाँ रहेको ताललाई व्यवस्थापन र तालको बिचमा मन्दिर निर्माणका लागि रु. ३० लाख विनियोजन भएको उहाँले बताउनुभयो ।
घुमाउरी वनभोज स्थलमा आउने समूहलाई रु. ६ सय देखि रु. १ हजार शुल्क लिने गरिएको छ । २३४ हेक्टर वन क्षेत्र रहेको घुमाउरी सामुदायिक वनको ७ हेक्टरमा फैलिएको घुमाउरी वनभोज स्थललाई ३३.७७ हेक्टरमा फैलाउने गरि कार्ययोजना तयार पारेको अध्यक्ष भट्टराईले बताउनुभयो । ‘थप यसलाई व्यवस्थापन गर्दै जाने योजना छ, जिल्लाको पर्यटकीय गन्तव्य सहित उत्कृष्ट बनभोज स्थलको रुपमा विकास गर्ने हाम्रो लक्ष्य हो, हामी यसमा लागेका छौं’ अध्यक्ष भट्टराईले बताउनुभयो ।

बालबालिकाहरुका लागि खेल्न निर्माण गरिएका संरचनाले यहाँ पुग्ने बालबालिकाले समेत रमाइलो गर्ने गरेका छन् । घुमाउरी आन्तरिक तथा बाह्य पर्यटकको गन्तव्य सहित बनभोज स्थलका रुपमा रोजाइमा पर्न थालेपछि वनको आम्दानी बढाउन समेत यसले सहयोग पुर्याएको छ । घुमाउरीमा बनभोजका लागि आएका समूहबाट शुल्क उठाए वापत गत वर्ष मात्रै गरि रु. ८ लाख आम्दानी गरिएको व्यवस्थापक उमा घर्तीले बताउनुभयो । घुमाउरीमा चहलपहल बढ्दै जाँदा यस क्षेत्र नजिक रहेका स्थानहरुमा समेत आर्थिक क्रियाकलाप बढ्न थालेको छ ।