कावासोती । कावासोती नगरपालिका वडा नं. १२ मा बुधबार भएको माटो परीक्षणमा १०३ जना कृषकको माटो परिक्षण गरिएको छ ।
वडा कार्यालय परिसरमा बुधबार माटो तथा मल परिक्षण प्रयोगशाला गण्डकी प्रदेशको आयोजना तथा वडा कार्यालयको समन्वयमा माटो परिक्षण कार्यक्रम भएको हो । परीक्षणपछि विज्ञले किसानलाई कृषि चुनको प्रयोग गर्न सुझाब दिएको वडा अध्यक्ष दिपेश खनालले जानकारी दिनुभयो । माटोमा चाहिने तत्व नाइट्रोजन , फस्फोरस र पोटास कम पाइएको अध्यक्ष खनालले बताउनुभयो ।
माटो तथा मल परिक्षण प्रयोगशाला गण्डकी प्रदेशका खुबराज बरा र भावना पोखरेल परीक्षणमा खटिनुभएको थियो ।
माटोमा पाइने तत्त्वहरू के कति मात्रामा छ ? यहाँको माटोमा कुन खेती गर्नु उपयुक्त हुन्छ ? भन्ने बारेमा जानकारी हासिल गर्न तथा माटोप्रतिको यहाँका कृषकलाई सचेतना वृद्धि गर्दै यहाँको समुदायलाई माटो स्वास्थ्य सुधार गर्न प्रोत्साहन गर्ने उद्देश्यले कार्यक्रम आयोजना गरिएको अध्यक्ष खनालले बताउनुभयो ।
यहाँको माटोको अवस्था बारेमा विज्ञबाट आएको सुझाव अनुसार किसानसँग समन्वय गरेर वडाबाट आवश्यक योजना बनाउने खनालले जानकारी दिनुभयो ।
