नवलपुर उद्योग वाणिज्य संघद्धारा जनप्रतिनिधिलाई सम्मान

कावासोती । नवलपुर उद्योग वाणिज्य संघले सोमबार २०७९ सालमा निर्वाचित जनप्रतिनिधिहरूलाई शुभकामना एवम् सम्मान कार्यक्रम गरेको छ ।
कावासोतीमा आयोजना गरिएको कार्यक्रममा भर्खर सम्पन्न प्रतिनिधि र प्रदेश सभा सदस्य निर्वाचनमा विजयी हुनुभएका प्रदेश सभा सदस्य रोशन बहादुर गाहा , पदमा जिसी श्रेष्ठ , गैंडाकोट नगरपालिका प्रमुख मदनभक्त अधिकारी , देवचुली नगरपालिका प्रमुख हरि प्रसाद न्यौपाने , बौदीकाली गाउँपालिका अध्यक्ष प्रकाश ओझा , बुलिङटार गाउँपालिका अध्यक्ष ई. दिपेन्द्र सुनारी , कावासोती नगर उपप्रमुख फूल कुमारी थनेत , गैंडाकोट नगरपालिका उपप्रमुख शान्ति कोइराला , बुलिङटार गाउँपालिका उपाध्यक्ष डिल माया रानालाई सम्मानपत्रले सम्मान गरिएको हो । नवलपुर उद्योग वाणिज्य संघका अध्यक्ष वैकुण्ठ प्रसाद अर्याल र उद्योग वाणिज्य संघ गण्डकी प्रदेशका उपाध्यक्ष ओम प्रसाद पौडेलले सम्मान गर्नुभएको थियो ।

कार्यक्रममा निर्वाचित सम्पूर्ण जनप्रतिनिधिहरूलाई हामी बनाउँछौ समृद्ध नवलपुर भन्ने प्रतिबद्धता पत्रमा हस्ताक्षर गराइएको थियो ।
कार्यक्रममा बोल्दै प्रदेश सभा सदस्य रोशन बहादुर गाहाले मुलुकमा स्थिर सरकार नभएसम्म देशको विकास गर्न गाह्रो हुने जिकिर गर्नुभयो । उहाँले स्थिर सरकार नभएसम्म निजी क्षेत्र मात्र होइन हरेक क्षेत्रमा समस्या सृजना हुने बताउनुभयो । उहाँले सबै पार्टीका घोषणा पत्रको चर्चा गर्दै ती घोषणा पत्रहरूमा उद्योग स्थापना गर्ने , रोजगारी सृजना गर्ने , मूल्यवृद्धि कम गर्ने , ब्याजदर कम गर्ने लगायतका कुरा उल्लेख रहेको टिप्पणी गर्दै घोषणा पत्र कार्यान्वयन गर्न भने नसकेको बताउनुभयो । घोषणा पत्रमा भएका कुरा कार्यान्वयन भएको भए , निजी क्षेत्र आज धराशायी बन्न नपर्ने उहाँको भनाई थियो । उहाँले निजी क्षेत्रसँग सहकार्य गरेर प्रदेशमा निती निर्माण तहसम्म कुरा पु¥याउन आफूले भूमिका खेल्ने समेत बताउनुभयो ।

यस्तै गैडाकोट नगर प्रमुख मदनभक्त अधिकारीले निजी क्षेत्रलाई सरकारले उचित हुने नीति निर्माण गर्न नसकेको बताउनुभयो । पछिल्ल्लो समय चर्को ब्याजदरले उद्योगी व्यवसायी मारमा परेको भन्दै उहाँले यस विषयलाई संघका प्रतिनिधिहरूले आवाज उठाउन जरुरी रहेको बताउनुभयो ।
यस्तै बौदीकाली गाउँपालिका अध्यक्ष प्रकाश ओझाले नवलपुरका पहाडी भूगोलमा पनि उद्योग वाणिज्य संघले उपस्थित जनाउन आग्रह गर्नुभयो । भौगोलिक अवस्थाले गर्दा जिल्लाका पहाडी पालिकाहरूमा उद्योगधन्दा व्यापार व्यवसाय फस्टाउन नसकेको भन्दै उहाँले अब केन्द्र र प्रदेश सरकारले विशेष योजना ल्याउनुपर्ने , प्रदेशसँग जोड्ने लाइफलाइनका रुपमा लिएको सडक निर्माण छिटो सम्पन्न गर्नुपर्ने बताउनुभयो । उहाँले पहाड रित्तिदै गएकोमा चिन्ता समेत व्यक्त गर्नुभयो । रित्तिएको पहाडलाई फेरी रिटर्न गर्न उद्योगधन्दा खोल्ने र स्थानीय पर्यटन विकास गरि स्वरोगार सृजना गर्न आवश्यक रहेको बताउनुभयो ।
कार्यक्रममा बोल्दै कावासोती नगरपालिका उपप्रमुख फूल कुमारी थनेतले उद्योग वाणिज्य संघ र नगपालिकाबीच समन्वयकारी भूमिका हुन आवश्यक रहेको औल्याउनुभयो ।
उद्योग वाणिज्य संघ गण्डकी प्रदेशका उपाध्यक्ष ओम प्रसाद पौडेलले निजी क्षेत्र अहिले गर या मरको अवस्थामा रहेको बताउनुभयो । नीजी क्षेत्रलाई माथी उठाउन सबैको हातेमालो आवश्यक रहेको बताउनुभयो ।
नेपाल पत्रकार महासंघ नवलपुरका अध्यक्ष बिरेन्द्र पराजुलीले पत्रकार महासंघ , उद्योग वासणजय संघ लगायतका संघसंस्थाहरुलाई स्थानीय तहको साथ सहयोग को निकै खाँचो रहनेमा जोड दिनुभयो । जिल्ला छुट्टिएपछि भवन अभाव , साधन श्रोतको अभावका बीच काम गर्नुपर्दा धेरै अप्ठेरो हुने गरेको बताउनुभयो ।
कार्यक्रममा स्वागत मन्तव्य राख्दै नवलपुर उद्योग वाणिज्य संघका वाणिज्य उपाध्यक्ष राजेन्द्र पाण्डेले व्यवसायी जगतको अप्ठेरोलाई सबैसंगको सहकार्यबाट नै सहज बनाउन सकिने भन्दै त्यसका लागि संघ , प्रदेश र स्थानीय सरकारले व्यवसायीका समस्या समाधान गर्न सकारात्मक भूमिका निर्वाह गर्न आग्रह गर्नुभयो ।
नवलपुर उद्योग वाणिज्य संघका अध्यक्ष वैकुण्ठ प्रसाद अर्यालको अध्यक्षतामा कार्यक्रम भएको थियो । उहाँले संघको आफ्नै कार्यालय भवन नहुँदा निकै समस्या हुँदै आएको बताउनुभयो । संघलाई नमुना सदरमुकाममा जग्गा व्यवस्थापन गरेको भए पनि कहाँ कति हो भन्ने अझै यकिन नभएको बताउनुभयो । जग्गाको विषयमा यकिन भएमा भवन निर्माणको प्रकृया अघि बढाउन सकिने बताउनुभयो । उहाँले व्यवसायी कर संकलनमा सबै स्थानीय तहले समन्वय गर्न आग्रह गर्नुभयो ।
कार्यक्रममा नवलपुर उद्योग वाणिज्य संघका महासचिव सागर पोख्रेलले सहजीकरण गर्नुभएको थियो ।