कावासोती । जिल्ला प्रहरी कार्यालय नवलपरासी पूर्वले सोमबार नाकाबन्दी नमुना अभ्यास गरेको छ ।
प्रहरीको काम कारवाहीलाई चुस्त दुरुस्त तथा थप सशक्त बनाई अपराध अनुसन्धानलाई अझै प्रभावकारी बनाउन सहयोग पुग्ने उद्देश्यले कर्तव्य ज्यान अपराध गरि फरार प्रतिवादीको पक्राउको लागि नाकाबन्दी नमुना अभ्यास गरिएको जिल्ला प्रहरी कार्यालयका सूचना अधिकारी सन्तोष पाठकले जानकारी दिनुभयो । अभ्यासमा समाजमा घट्न सक्ने घटनालाई विषयवस्तु बनाई काल्पनिक घटना गराई एक व्यक्ति फरार भएका थिए त्यसपछि प्रहरीको काम कारवाही सुरु भएको थियो ।
प्रहरीले ठाउँ ठाउँमा सम्भावित नाका तथा बाटो चेकपोष्ट खडा गरि प्राप्त भएको हुलियाबाट चेकजाँच शुरु गरेको थियो । चेकजाँचको क्रममा कावासोती नगरपालिका ८ फलफूल चोकमा हुलियासँग मिल्दोजुल्दो शंकित व्यक्ति प्रहरी टोलीले फेला पारेको थियो । त्यस्तै घटनास्थलमा प्रहरी टोली खटिई घटनास्थललाई कर्डन गरि घटनास्थलसँग सम्बन्धित मुचुल्का गर्नुका साथै प्रमाण संकलन गरेको थियो ।
