कावासोती । जिल्ला समन्वय समिति नवलपुरले शुक्रबार एक सय दिनको कार्यप्रगति विवरण सार्वजनिक तथा पत्रकारहरूसँग अन्तरकृया कार्यक्रम गरेको छ ।
कार्यक्रममा जिल्ला समन्वय समितिका प्रमुख बाबुराम विश्वकर्माले प्रस्तुतीकरण राख्नुभएको थियो । उहाँले एक सय दिनमा गरेका कार्य प्रगति प्रस्तुत गर्दै महत्वपूर्ण कामका रुपमा जिल्लामा सञ्चालनमा रहेका १४ भन्दा बढि विभिन्न क्रसर उद्योगहरूको अनुगमन गरि मापदण्ड विपरित सञ्चालनमा रहेका उद्योगहरूलाई मापदण्डभित्र सञ्चालन गर्न पहल गर्ने कार्य गरेको बताउनुभएको छ ।
उहाँले अनुगमनमा कुनै पनि नवीकरण नगरिएको पाइएको साथै उद्योगको उत्पादन क्षमता भन्दा बढि उत्पादन गरेको पाइएकोले आवश्यक मापदण्डमा रहि उद्योग सञ्चालनको लागी पहल गरिएको बताउनुभयो । यस्तै १२ वटा बालुवा प्रशोधन केन्द्र अनुगमन गरिएको उहाँले जानकारी दिनुभयो । यस्तै उहाँले समग्र नवलपुर जिल्लाकै विकासको खाका कोर्ने सबै पालिकाहरू सँगको सहकार्य तथा जि.स.स. को नेतृत्व र समन्वयमा “समृद्धि नवलपुर अभियान” अन्तर्गत नवलपुर विकास खाका कोर्ने र जिल्ला प्रोफाइल बनाउने योजनाको कार्य भइरहेको , जिल्ला स्थित सरकारी कार्यालयमा रहेको विभिन्न सूचनाहरूलाई एकद्वार प्रणाली अन्तर्गत जि.स.स. जिल्लाकै सूचना केन्द्र बनाउन रूपान्तरणको प्रयास भैरहेको , विभिन्न गैरसरकारी सङ्घसंस्थाहरूको गतिविधिलाई नियमन र अनुगमन गरिएको ,प्रविधि मैत्री डिजिटल नवलपुर निर्माणको लागी आवश्यक पहलको सुरुवात भइरहेको ,संघीय मामला तथा सामान्य प्रशासन मन्त्रालय बाट जि.स.स. नवलपुर कार्यालयको आफ्नै जग्गामा भवन निर्माण र बजेट विनियोजन पहल गरिएको छ । र आवश्यक रकम माग गरिएको समेत जानकारी दिनुभयो ।
यसैगरी जिल्ला भित्र रहेका सबै धार्मिक मठ मन्दिरहरूको तथ्याङ्क लिने र धार्मिक पर्यटक विकासमा पहल तथा अनुगमन गर्ने , लागू पदार्थ दुर्व्यसनी पुनस्थापना केन्द्रको तथ्याङ्क लिने र अनुगमन गर्ने , बैंक, सहकारी तथा लघुवित्त संथाहरुको तथ्याङ्क लिने र अनुगमन गर्ने कार्यको सुरुवात भएको , जिल्ला भित्र रहेका दक्ष जनशक्ति र उच्च प्राविधिकहरूको रेकर्ड राख्ने कार्यको थालनी भएको जानकारी दिनुभयो ।
नन्दपुर,सेरी,भुताहा,कोल्हुवा बलकट्टा स्थानका बाढीपीडित ७ घर परिवारलाई तत्काल उद्वार गरि सुरक्षित ठाउँमा स्थानान्तरण गरिएको र बिनयी त्रिवेणी गाउँपालिका अन्तर्गत रहेको ६ वटा खोलाको विभिन्न ६ खण्डको आइइ को रिर्पोटको प्रतिवेदन अनुसार पुन जि.स.स. प्रमुखको नेतृत्वमा फिल्ड अनुगमन सम्पन्न गरिएको बताउनुभयो । कार्यक्रममा जिल्ला समन्वय समिति उपप्रमुख शकुन्तला लम्सालले स्वागत मन्तव्य राख्दै जिल्लालाई नमुना जिल्ला बनाउनका लागि प्रदेश सरकारसँग पहल गरिएको बताउनुभयो । जिल्ला समन्वय समिति सञ्चालनका लागि आवश्यक नीति, कार्यविधि र कानून समेतको खाँचो औँल्याएकाले त्यसका लागि समन्वय गर्न प्रदेश सरकारसँग ध्यानाकर्षण गर्ने काम गरेको बताउनुभयो । नवलपुर जिल्लालाई समृद्ध र विकासमा अगाडि बढाउन समन्वयले हरसम्भव पहल गरिरहेको बताउनुभयो ।
कार्यक्रममा नेपाल पत्रकार महासंघ गण्डकी प्रदेशका अध्यक्ष नारायण शर्मा , नेपाल पत्रकार महासंघ नवलपुरका अध्यक्ष बिरेन्द्र पराजुली , क्रान्तिकारी पत्रकार महासंघ केन्द्रिय उपाध्यक्ष रामकुमार श्रेष्ठ , क्रियाशील पत्रकार महिला नवलपुरकी अध्यक्ष ज्ञानु पंगेनीले मन्तव्य राख्नुभएको थियो ।
कार्यक्रममा जिल्ला समन्वय समिति नवलपुरका सदस्य कुलप्रसाद शर्मा भुसालले धन्यवाद मन्तव्य राख्नुभएको थियो ।
पत्रकारहरूले एक दिनमा गरेका कार्य प्रगतिका विषयमा जिज्ञासा र प्रश्न समेत राखेका थिए । जिसस प्रमुख विश्वकर्माले ती जिज्ञासाको सम्बोधन गर्नुभएको थियो ।
