नवलपुर । नवलपरासी ( बर्दघाट सुस्तापूर्व ) नवलपुरको देवचुली नगरपालिका –३, निवासी एलिजा थापा उमेरले भरखर ११ वर्षको पुग्नुभयो । तर उहाँ सानै उमेरमा राष्ट्रिय स्तरको खेलुकुद प्रतियोगितामा सहभागि हुनुभएको छ । गण्डकी प्रदेशमा जारी नवौँ राष्ट्रिय खेलकुद प्रतियोगिता अन्र्तगत सेपाकताक्रो खेल प्रतियोगिता तर्फ थापाले सहभागिता जनाउनुभएको हो । सम्भवत जारी प्रतियोगिताको उमेरले कान्छी खेलाडी थापानै रहनुभएको छ ।
नवौँ राष्ट्रिय खेलकुद प्रतियोगिता अन्र्तगत नवलपरासी ( बर्दघाट सुस्तापूर्व ) नवलपुरमा जारी सेपाकताक्रो खेल प्रतियोगितामा अन्र्तगतका तीन इभेन्ट मध्य थापा ‘रेगु इभेन्ट’ ( एक समूहमा तीन जना खेलाडी समावेश हुने खेल ) तर्फ सहभागी बन्नुभयो । दुई विधामा भने उहाँ ‘वेन्च’मा बस्नुपर्यो । गण्डकी प्रदेश तर्फबाट उक्त खेलमा सहभागी बन्नुभएकी थापाको समूह उपविजेता बन्दै रजत जित्न सफल भयो । ११ वर्षकै उमेरमा राष्ट्रिय स्तरको प्रतियोगिता खेल्न पाउँदा धेरै खुसी लागेको थापाले बताउनुभयो । ‘मलाई धेरै खुसी लागेको छ , सानै उमेरमा प्रदेशको टिममा पर्न पाए तेती मात्रै होइन , राष्ट्रिय स्तरको प्रतियोगितामा सहभागि हुने अवसर समेत मिल्यो’ थापाले भन्नुभयो ‘आफू सहभागि प्रतियोगितामा स्वर्ण जित्ने लक्ष्य थियो तर पनि रजत प्राप्त गरेका छौं, यसले पनि मलाई थप हौसला मिलेको छ । ’
थापा आवद्ध गण्डकी प्रदेशले जारी प्रतियोगितामा सेपाकताक्रो तीनवटा विधा अन्र्तगत महिला तर्फ भएका खेलमा दुई काश्य र एक रजत प्राप्त गरेको छ । कक्षा ६ मा अध्ययनरत थापाले आफू पहिलो पटक राष्ट्रिय स्तरको प्रतियोगिता खेलेको र जारी खेलका अनुभवले आगामी दिनमा थप राम्रो गरि खेल्ने बताउनुभयो । ‘पहिलो पटक राष्ट्रिय स्तरको खेल खेल्दा केही डर त थियो नै ,तर डरसँगै सिकाइपनि मेरा लागि धेरै भयो, यही अनुभवका आधारमा भोलि थप राम्रो गर्नेछु भन्ने विश्वास बढेको छ’ उहाँले भन्नुभयो । भोलिका दिनमा राष्ट्रिय स्तरका खेलाडीको पहिचान बनाउने र नेपाल आर्मीमा सेवा गर्ने लक्ष्य रहेको थापाले बताउनुभयो । गाउँघरका दाइहरू सेपाकताक्रो खेल खेल्ने गरेको थाहा पाएपछि आफूमा पनि सो खेल खेल्ने चाहना भएकाले गाउँकै दाजुहरु मार्फतनै ९ महिना अघिदेखि सेपाकताक्रो खेल खेल्न शुरु गरेको थापाले बताउनुभयो ।
यता एलिजासँगै नवलपुरको देवचुलीकै १५ वर्षीय निरन गुरुङसमेत सेपाकताक्रो खेल प्रतियोगितामा सहभागी भएका छन् । गण्डकी प्रदेशको टिम मार्फत गुरुङ नवौँ राष्ट्रिय खेलकुद प्रतियोगिता अन्र्तगतको सेपाकताक्रो खेल प्रतियोगितामा सहभागी हुनुभएको हो । कक्षा सातमा अध्ययनरत गुरुङले एक वर्ष अघि यो खेल खेल्न शुरु गरेको र अहिले राष्ट्रिय प्रतियोगितामा खेल खेल्ने गरि प्रदेश स्तरको टिममा समावेश हुन पाउँदा खुसी लागेको बताउनुभयो ।
नवौँ राष्ट्रिय खेलकुद प्रतियोगिता अन्र्तगत सेपाकताक्रो खेलको विभिन्न तीन विद्या मध्य पुरुष र महिला तर्फका दुई खेल बाँकी रहेका छन् । नवलपुरमा जारी प्रतियोगिता दुई खेल आज हुनेछन् । ‘क्वाड इभेन्ट’ अन्र्तगत महिला तर्फको स्वर्ण पदकका लागि आज नेपाल आर्मी र बागमती प्रतिस्पर्धा गर्नेछन् । आजनै सेपाकताक्रो ‘रेगु इभेन्ट’ ( एक समूहमा तीन जना खेलाडी सहभागी हुने खेल ) पुरुष तर्फको स्वर्ण पदकका लागि नेपाल आर्मी र गण्डकी भिड्ने छन् ।
नवलपुरमा जारी सेपाकताक्रो खेल प्रतियोगितामा नेपाली आर्मी सहित प्रदेश १, वाग्मती, गण्डकी, लुम्बिनी, सुदूरपश्चिम र कर्णाली प्रदेश सहभागि रहेको थियो । जारी प्रतियोगिता आज समापन हुनेछ ।
