कावासोती । नवौँ राष्ट्रिय खेलकुद प्रतियोगिता अन्र्तगत नवलपुरमा जारी कुस्ती खेल प्रतियोगितामा एक जना खेलाडी घाइते भएका छन् । कुस्ती खेल खेल्ने क्रममा खेलाडीको हात भाँचिएको हो ।
जिल्लाको कावासोती नगरपालिका –१६, डण्डामा रहेको थारु राष्ट्रिय सङ्ग्राहलयमा जारी कुस्ती खेल प्रतियोगिता अन्र्तगत सुदुरपश्चिम प्रदेश र सशस्त्र प्रहरी बिचको खेलमा कञ्चनपुर भिमदत्त नगरपालिका –१७, का खेलाडी २४ वर्षीय टिका चन्दको हात भाँचिएको जिल्ला खेलकुद विकास समिति नवलपुरका अध्यक्ष सेतमान पुनले बताउनुभयो । खेलका क्रममा हात भाँचिएका चन्दको पुरानो मेडिकल कलेज भरतपुरमा उपचार भइरहेको छ ।
नवलपुरमा जारी कुस्ती खेल प्रतियोगितामा महिला र पुरुषतर्फ गरि विभिन्न तौल समूहमा खेलहरु जारी रहेका छन् । प्रतियोगितामा ५९ जना महिला र पुरुष ९१ जना गरि १ सय ५० खेलाडी सहभागि रहेका छन् ।
तीन विभागिय टिम सशस्त्र, आर्मी, पुलिस साथै ७ वटा प्रदेश गरि १० वटा टिमको प्रतियोगितामा सहभागिता रहेको छ । जारी प्रतियोगिताको विभिन्न तौल समूह अन्र्तगत आजदेखि पदकको छिनोफानो शुरु हुनेछ ।
