बौदिकालीकाे मचेडीमा सामुदायिक स्वास्थ्य इकाई उद्घाटन

डेढगाउँ । बौदिकाली गाउँपालिका वडा नम्बर १ स्थित  मचेडिमा आज सामुदायिक स्वास्थ्य इकाइ उद्घाटन भएको छ । मचेडीमा एक कार्यक्रमका बिच गाउँपालिका अध्यक्ष प्रकाश ओझाले सामुदायिक स्वास्थ्य इकाई उद्घाटन गर्नुभएको हो ।
आधारभुत स्वास्थ्य सेवा सबेेेैको अधिकारको कुरा रहेको बताउदै अध्यक्ष ओझाले तत्काललाई अस्थाई संरचनाबाट नै भएपनि यहाँका जनताले स्वास्थ्य सेवा पाउने कुरामा सुनिश्चितता भएको बताउनुभयो । यो ईकाइले मचेडी लगाएत आसपासका सेवाग्राहीलाई सामान्य रोगको परिक्षण गर्नपनि डेढगाउ र घुमारी पुग्नुपर्ने अवस्थाको अन्त्य हुने बताउनुभयो । स्वास्थ्य नागरिकको आधारभुत आवश्यकता भएको बताउदै उहाँले आधारभुत आवश्यकता पूरा गर्ने दायित्व पालिकाको रहेको र पालिकाले आवश्यक अन्य स्थानमा पनि सुरूवात गर्दै जाने बताउनुभयो ।
कालिगण्डकी करिडोर केही समयमा नै फुलफेजमा सञ्चालन हुने र दुर्घटना पनि बढ्न सक्ने बताउदै त्यसको पुर्वसावधानीको रूपमा पनि यो इकाई सहयोगि हुने अध्यक्ष ओझाले बताउनुभयो । सामुदायिक स्वास्थ्य इकाई आवश्यक रहेको महसुस गर्दै स्थापना गर्नका लागि कार्यपालिकाले फोकल पर्सनको रूपमा वडा सदस्य रविन्द्रराज कण्डेललाई जिम्मेवारी दिइएको र जिम्मेवारी अनुसार नै जग्गा प्राप्तिमा ठूलो भुमिका निर्वाह गर्नुभएकोमा वडासदस्य कण्डेललाई विशेष धन्यवाद व्यक्त गर्नुभयो । साथै सामुदायिक स्वास्थ्य इकाई अस्थायी रूपमा स्थापना गर्नका लागि कोठा उपलब्ध गराउनुहुने तथा जग्गा उपलब्ध गराउनुहुने जग्गादाताहरू प्रति गाउपालिका सधै आभारी रहने बताउदै उहाँहरूलाई गाउपालिकाबाट बिशेष सम्मान गरिने पनि बताउनुभयो ।
गाउँपालिकाका प्रमुख प्रशासकिय अधिकृत लेख बहादुर बस्नेतले बौदिकाली आउने बित्तिकै स्वास्थ्य ईकाइ जस्तो महत्वपुर्ण कार्यको सुरूवात गर्न पाएको बताउदै यसको संरक्षण गर्ने जिम्मा स्थानियले लिएको खण्डमा गाउपालिकाले यसको स्तरउन्नति गर्न सहज हुने बताउनुभयो, साथै अब यहाँ बन्ने भवन बहुउद्देश्यीय बनाउनु पर्ने जसको कारणले स्थानीयले लाभ लिन सक्ने बनाउनेतर्फ गाउँपालिका अगाडि बढ्ने पनि बताउनुभयो ।

कार्यक्रमको अध्यक्षता गर्दै बौदिकाली १ का वडा अध्यक्ष अनिल थापाले अप्रेसन गर्ने अस्पताल भन्दा प्राथमिक उपचार गर्ने सामुदायिक स्वास्थ्य इकाईको महत्व र भुमिका ठूलो हुने हुँदा यसको प्रयोग स्थानियले स्वास्थ्य परामर्श तथा रेगुलर चेकजाँच गरेर लिनुहुन पनि अनुरोध गर्नुभयो ।

सामुदायिक स्वास्थ्य इकाई अध्यक्ष ज्युको विशेष पहलमा स्थापना भएको बताउदै स्वास्थ्य शाखा प्रमुख टोपकान्त अधिकारीले विस्तारै आवश्यक जनशक्तिको परिपुर्ति गर्न गाउँपालिकासँग पहल गर्ने बताउनुभयो ।

साथै सामुदायिक स्वास्थ्य इकाई उद्घाटन कार्यक्रममा स्थानीय समाजसेवी डोलराज कण्डेल,चोलाकान्त कण्डेल,मनबहादुर ठाडा,पिताम्बर कण्डेल लगाएतले भनाइ राख्नुभएको थियो भने कार्क्रमको सञ्चालन वडा सदस्य रविन्द्रराज कण्डेलले गर्नुभएको थियो ।