कावासोती । नवलपुरको हुप्सेकोट गाउँपालिका चार शंखदेवका एक युवक आफ्नो गाउँ सरसराइ राख्न एक्लै लागिपरेका छन् ।
उनले आफ्नो गाउँठाउँ सरसफाइ राख्न स्थानीयलाई सहकार्य गर्न अनुरोध गरे पनि कसैले नसुने पछि एक्लै सरसफाइ अभियानमा लागेका हुन् । उमेरले १८ वर्ष मात्रै पुगेका राम भुसाल सरसफाइ अभियानलाई एक्लै भए पनि सफल पार्छु भन्ने अठोटका साथ लागेका छन् ।
स्थानीयलाई जताभावी फोहोर नफालौँ भनेर उनले अनुरोध समेत गर्दै आएका छन् । तर पनि अटेर गरेर जथाभावी फोहोर फाल्ने गरेको उनी बताउँछन् । आफ्नो गाउँठाउँ सफा राख्न सबै मिलेर सरसफाइ अभियान चलाऔँ भनेर उनले अनुरोध गरे पनि आफू सानो भएकाले कसैले आफ्नो कुरा नसुनेको उनको गुनासो छ । समुदायका अन्य व्यक्तिहरूले आफ्नो कुरा नसुने पनि आफू आफ्नो अभियान नछोड्ने अठोट गर्दै उनले शंखदेव स्थित जनकल्याण मा वि परिसर सरसफाइ गरेका छन् । उनले सामाजिक सञ्जाल फेसबुक मार्फत सरसफाइमा सहकार्य गर्न अनुरोध समेत गरेका छन् ।
आफ्नो अभियानमा साथ पाए राम्रो नभए आफू एक्लै भए पनि सरसफाइ अभियानलाई निरन्तरता दिने उनले बताएका छन् ।
उनी नगर बाल सञ्जाल तथा विभिन्न सामाजिक संस्थाहरूमा सक्रिय छन् । संघसंस्थाहरूमा बसेर तालिम लिइरहँदा गाउँठाउँको सरसफाइ पनि एक महत्वपूर्ण पक्ष हो भनेर बुझेकाले आफ्नो गाउँठाउँ सफा राख्न सबैलाई साथ लिएर हिँडाउन खोजेका उनी कसैको साथ नपाएपछि एक्लै लागेको बताएका छन् ।
जलवायु परिवर्तनमा वातावरण सरसफाइको पनि ठूलो हात हुने र वातावरण सफा सुन्दर भएमा जैविक विविधता जोगाउन समेत मदत पुग्ने हुँदा सरसफाइ जस्तो महत्वपूर्ण कुरालाई सानो मान्छेका कुरा के सुन्ने भनेर हेलचेक्र्याइँ नगर्न समेत उनले सबैमा अनुरोध गरेका छन् ।
