हुप्सेकोटमा जंगली च्याउ खाँदा एकै घरका पाँच सहित ६ जना बिरामी

कावासोती । नवलपुरको हुप्सेकोटमा जंगली च्याउ खाँदा एकै घरका पाँच जना सहित ६ जना बिरामी परेका छन् ।
जिल्ला प्रहरी कार्यालय नवलपुरले दिएको जानकारी अनुसार हुप्सेकोट पाँच नाम्जाकोट निवासी ६७ वर्षकी जासु  सोती मगरको परिवारका पाँच जना र हुप्सेकोट एक जुकेपानीकी ४५ वर्षकी  मीना कुमारी सोमै बिरामी पर्नुभएको हो  ।
जासुको अवस्था गम्भिर रहेको प्रहरीले जनाएको छ । उहाँका छोरा ३२ वर्षको गम्भिर  सोती  मगर , बुहारी २६ वर्षकी तिलीसरा सोती  मगर , ६ वर्षकी नातिनी रबिना सोती  मगर , पाँच वर्षकी नातिनी अस्मिता सोती मगर बिरामी परेका हुन् ।
गम्भिर घाइतेलाई भरतपुर रिफर गरिएको र अन्यको मध्यबिन्दु जिल्ला अस्पतालमा उपचार भइरहेको प्रहरीले जनाएको छ ।  जुकेपानीकी मीना सोमैलाई पनि जिल्ला अस्पतालमा सामान्य उपचारपछि भरतपुर रिफर गरिएको छ । 

जासुको परिवारले हिजो जंगलबाट खोजेर ल्याएको च्याउ पकाएर खाएका थिए । हिजो साँझ साढे ६ बजेतिरबाट उनीहरु बिरामी पर्न थालेपछि अस्पताल ल्याईएको हो ।

नवलपुरमा जंगली च्याउ खाएर बिरामी पर्ने घटना वर्षेनी हुने गरेको छ । विशेषगरि जिल्लाको पहाडी भेगमा यस्ता घटना हुने गरेको छ । कतिपयले ज्यानै गुमाउनुपरेको छ । कतिपय  जंगली च्याउ विषालु हुने भएकाले समयमै उपचार नपाए  ज्यानै लिन्छ  । आम नागरिकलाई विषालु च्याउका बारेमा सचेतना जगाउन जरुरी  रहेको सरोकारवालाहरू बचाउँदछन् । वर्षेनी यस्ता घटना भए पनि सम्बन्धित निकायले रोकथामका लागि कुनै चासो नदिदा पटक पटक यस घटना दोहोरिरहेको सरोकारवालाको भनाई छ ।