कावासोती । स्थानीय तहको निर्वाचन नजिकिदै जाँदा दलहरु चुनावी तयारीमा व्यस्त छन् । मतदातालाई आफ्नो पक्षमा पार्न दलहरू लागेका छन् । पार्टीका कार्यक्रम टोल टोल सम्म पुगेको छ । यहि बिचमा सुकुम्बासी बस्तीमा भने नो लालपुर्जा नो भोटको आन्दोलन चर्किदै गएको छ । बर्षौ देखि बसोबास गरेको भूमिको लालपुर्जा पाउन नसकेको भन्दै पुर्जा बिहिनहरु आन्दोलनको विगुल फुकिरहेका छन् ।
निर्वाचनको समयमा भोट बैंकका रुपमा प्रयोग हुने भूमिहिन ,सुकुम्बासी बस्तीमा अहिले जोडले आवाज गुन्जिन थालेको छ नो भोट नो लाल पुर्जा’ भन्दै । सोमबार कावासोती नगरपालिका १३ मा पुर्जा माग गर्दै यहाँका समुदाय आन्दोलीत बने । लामो समय सम्म लालपुर्जा पाउन नसकेको भन्दै उनिहरु आन्दोलित भएका हुन् । स्थानीयले नो लालपुर्जा नो भोटको नारा लगाउदै कावासोती १३ का विभिन्न टोल परिक्रमा गरेका थिए ।
चुनावको समयमा पुर्जाको आश्वासन दिने र पछि बेवास्ता गर्ने गरेकाले अहिले नो भोटको आन्दोलन सुरु गरेको स्थानीय सम्भु घलेले बताउनुभयो ।
आयोग निर्माण गरि पुर्जा वितरण कार्यको थालनी हुँदा आफूहरु खुसी भएकोमा सरकार परिवर्तन भई भुमी सम्बन्धी आयोग खोरज गरि नयाँ आयोग गठन भएको लामो समय सम्म पनि जग्गा धनी प्रमाण पुर्जा वितरण गर्ने कार्य अगाडि नबढेको हुनाले आफुहरु दुखी भएको घलेले बताउनुभयो ।
विभिन्न वाहानामा दुख दिने तथा झुक्याउने काम मात्रै भएको हुनाले आफुहरु आन्दोलीत भएको र आसन्न स्थानीय ,प्रदेश र संघको निर्वाचनमा नो लालपुर्जा नो भोटको आन्दोलन जारी राख्ने उहाँले बताउनुभयो ।
स्थानीयले वडाका विभिन्न टोल परिक्रमा पछि कावासोती वडा नम्बर १३ को कार्यालयमा पुगेर नाराबाजी गरेका थिए । लालपुर्जा माग गरेका स्थानीयले मध्यवर्ती खारेजीको समेत नारा लगाएका थिए ।
आन्दोलनरत संघर्ष समितिले वडा कार्यालयमा ज्ञापन पत्र समेत बुझाएका छन् । वडा अध्यक्ष विनोद रानालाई ज्ञापन पत्र बुझाएका हुन् । ज्ञापन पत्र बुझ्दै वडा अध्यक्ष रानाले आफ्नो तर्फबाट आवश्यक पहल हुने बताउनुभएको थियो ।
कावासोतीमै यस अघि वडा नम्बर १ मा समेत नो लालपुर्जा नो भोटको आन्दोलन चलेको थियो । यस्तै देवचुली नगरपालिका सहित अन्य विभिन्न क्षेत्रका सुकुम्बासी बस्तीमा समेत नो लालपुर्जा नो भोटको आन्दोलन चलेको छ ।
