कावासोती नगरपालिकाद्वारा ९७ विपन्न तथा सिमान्तकृत परिवारलाई घर हस्तान्तरण

कावासोती । कावासोती नगरपालिकाका प्रमुख प्रशासकीय अधिकृत रमेश घर्तीले स्थानीय गरिव, विपन्न तथा सिमान्तकृत समुदायको आवासको अधिकार सुनिश्चितता गर्न कावासोती नगरपालिका प्रतिबद्ध रहेको बताउनु भएको छ ।
नगरपालिकामा सञ्चालित विभिन्न कार्यक्रम मार्फत हाल सम्म ९७ गरिव तथा विपन्न परिवारलाई घर निर्माण गरि नगरपालिकाले हस्तान्तरण गरेको भन्दै थप १८ वटा घर निर्माणको क्रममा रहेको उहाँले बताउनुभयो । अनौपचारिक क्षेत्र सेवा केन्द्र (इन्सेक) नवलपुरले आयोजना गरेको आवासको अधिकारको सवालमा स्थानीय सरकार र सरोकारवाला बीचको अन्तक्र्रिया कार्यक्रममा उहाँले सुरक्षित नागरिक आवास कार्यक्रम मार्फत नगरपालिका भित्रका दुई सय वटा घरमा खरको छानो बिस्थापित गर्ने कार्य भइरहेको बताउनुभयो ।

तराई मधेष समृद्धि कार्यक्रम मार्फत विभिन्न कार्यहरु सञ्चालन गर्न सक्ने अवस्था भएपनि कावासोती नगरपालिकाले विपन्न तथा सिमान्तकृत नागरिकहरुको सुरक्षित आवासको व्यवस्थापनलाई प्राथमिकतामा राखेर घर निर्माण गरेर हस्तान्तरण गरेको बताउनुभयो । ८६ वटा घर हस्तान्तरण भइसकेको र १८ वटा घर निर्माणको क्रममा रहेको उहाँले बताउनुभयो । यस्तै जनता आवास कार्यक्रम मार्फत ११ वटा घर निर्माण गरि हस्तान्तरण गरिएको छ । नगरपालिका भित्रका सिमान्तकृत माझि, मुसहर र बोटे समुदायका स्थानीयहरुलाई दुई कोठाको घर निर्माण गरेर नगरपालिकाले घर हस्तान्तरण गरेको उहाँले बताउनुभयो ।
आवाससंग प्रत्यक्ष जोडिएको भूमि सम्बन्धि समस्या सामाधानको लागि कावासोती नगरपालिकामा लगत संकलन, नक्सा तयार लगायतको कार्य सम्पन्न भएको अवस्थामा आयोग खारेज हुदाँ कामहरु रोकिएको भएपनि अब पुनः गठन भएको आयोग मार्फत पूर्ववत अवस्थाबाट कार्य अगाडी बढाउने उहाँले बताउनुभयो ।
नगरपालिकाले कावासोती नगरपालिका–१२ मा रहेको वृद्धआश्रममा भवन निर्माण सहयोग गरि परिवार विहिन बनेका व्यक्तिहरुलाई आवासको व्यवस्थापन गरेको घर्तीले बताउनुभयो ।
संविधानमा मौलिक हकको रुपमा रहेको आवासको अधिकार प्रत्याभूत गर्न नगरपालिका सदैव प्रतिबद्ध रहेको भन्दै उहाँले विपतको समयमा आवास बिहिन हुने अवस्थाको सृजना भएको खण्डामा त्यसको तत्कालिन व्यवस्थापनको कार्य विगत देखि गर्दै आएको बताउनुभयो ।
कार्यक्रममा नेपाल पत्रकार महासंघ नवलपुरका अध्यक्ष विरेन्द्र पराजुलीले इन्सेक मार्फत भएको कार्यक्रमले आम जनता सम्म नगरपालिका मार्फत भएको कार्यहरुको जानकारी संगै नगरपालिकालाई आगामी दिनमा योजना निर्माण तथा प्राथमिकिकरण गर्न सहयोग पुगेको बताउनुभयो । सबै नागरिकलाई आवासको व्यवस्थापन गर्नु सरकारको दायित्व भएको भन्दै उहाँले स्थानीय सरकारको रुपमा नगरपालिकाले गरेको कार्य उदारणिय रहेको बताउनुभयो ।

कार्यक्रममा सहभागि जनप्रतिनिधि, स्थानीय मानव अधिकार समूहका सदस्यहरु, पत्रकार लगायतले नगरपालिका मार्फत भइरहेको कार्यहरुको बारेमा जिज्ञासाहरु राख्नु भएको थियो ।
अनौपचारिक क्षेत्र सेवा केन्द्र (इन्सेक) ले नवलपरासी पूर्वको कावासोती नगरपालिका र विनयी त्रिवेणी गाउँपालिकामा स्थानीय समुदायलाई समेत पार्दै जिम्मेवार निकायलाई जवाफदेही बनाउन पहल कार्यक्रम (इएलपी) मार्फत शिक्षा, स्वास्थ्य, खाद्य र आवासको अधिकार सम्बन्धि कार्यक्रमहरु सञ्चालन गर्दै आएको कार्यक्रममा इन्सेक जिल्ला प्रतिनिधि तिर्थराज डुम्रेले जानकारी दिनुभयो ।