हुप्सेकोटमा डिजिटल कृषि सुचना तथा सेवा केन्द्रको स्थापना

कावासोती ।  नवलपुरको हुप्सेकोट गाउँपालिकामा डिजिटल कृषि सुचना तथा सेवा केन्द्रको स्थापना गरिएको छ ।
विद्युतिय प्रविधि सहितको ई–चौतारी उद्घाटन गरिएको हो । हुप्सेकोट गाउँपालिका अध्यक्ष लक्ष्मी पाण्डेले उद्घाटन गर्नुभएको हो । यस कार्यक्रम सुरु भए संगै हुप्सेकोट गाउँपालिका कृषि सुचना तथा प्रविधिमा यो टेक्नोलोजी प्रयोग गर्ने पहिलो गाउँ पालिका बन्न सफल भएको छ ।
कृषकहरुको सम्पूर्ण विवरण सहित उनीहरुको खेतबारी र बाली संगै उक्त बालीमा लाग्ने रोग किराको समाधान, मलखादको माात्रा, बिउको छनोट, सिंचाई, गोडमेल, र त्यसको उचित सम्भार गर्दै किसानहरुका लागि उचित लाभ प्राप्तीमा सहयोगी हुने गरी तयार पारिएको जियो कृषि मोबाईल एप्स र यसका अन्य तालिम प्याकेज सहितको विद्युतिय प्रविधि सहितको ई–चौतारी उद्घाटन गरिएको हो । कार्यक्रममा बोल्दै गाउँपालिकाका अध्यक्ष पाण्डेले गाउँपालिकामा व्यवसायिक कृषि तथा पशुपालक किसानहरुको उल्लेख्य संख्या रहेको, उत्पादन र बजारीकरणमा संलग्न रहेको दक्ष कृषि प्राविधिकको प्रयाप्त उपलब्धता र किसानका लागि तालिम शिक्षा र कृषि सम्वन्धी सुचनाहरु तथा परामर्श सेवा उपलब्ध गराउन नसकिरहेको सन्दर्भमा यो टेक्नोलोजी निकै महत्वपूर्ण हुने भन्दै आँफूहरुले छोटो समयमै यसको स्थापना र शुभारम्भ गर्न तत्परता देखाएको वताउनु भयो । उहाँले व्यवसायिक किसानहरुका लागि उचित प्राविधिक ज्ञान, सुचना र परामर्श सहितको प्याकेज भएकाले यसबाट पालिका क्षेत्रका किसानहरुले धेरै भन्दा धेरै फाईदा लिने विश्वासका साथ सम्पूर्ण किसानहरु लाई यस प्रविधि संग जोडिन र धेरै भन्दा धेरै लाभ लिन अनुरोध गर्नु भयो ।

हाल यो एप्लीकेसनमा एक पटक कनेक्सन भए पछि ईन्टरनेट विना पनि चलाउन सकिने, नेपाली भाषमा पनि भएको, स्वचालित सन्देशहरु आईरहने, स्मार्ट सुचना प्रणाली भएको, मौसम पूर्वानुमान को जानकारी दिने, आफु लाई चाहिएको थोक बजारको मुल्यको जानकारी समेत पाईने, कृषि वाली तथा पशु पंक्षी समेतको सम्पूर्ण सुचनाहरु समेटिएको र तीनको भर्चुअल स्वास्थ्य जाँचको सुविधा समेत भएको र आगामी दिनमा यस एप तथा वेव सुचना प्रणाली लाई किसानहरुको माग सल्लाह सुझावका आधारमा थप विशिष्टिकृत र परिस्कृत गर्दे लगिने पाथवे टेक्नोलोजी (जियो कृषि) का प्राविधिक विक्रम नेपालीले वताउनु भयो ।

हेफर ईन्टरनेशनल नेपालको सहयोगमा हिमालयन सामुदायिक विकास मञ्च (हिकोडेफ) ले परियोजना सञ्चालन गर्दै आएका नवलपरासी पूर्वका मध्यविन्दु, हुप्सेकोट देवचुली र बुलिंगटार गरी ४ वटा पालिकाबाट यो अभियान सञ्चालन गर्न लागिएको हिमालयन सामुदायिक विकास मञ्चका कार्यक्रम संयोजक बिष्णु प्रसाद कँडेल ले वताउनु भयो । आँफुहरुले यस अघि उत्पादन र उत्पादकत्व वृद्धि गर्नका लागि कृषि पशुपालनका क्षेत्रमा, महिला शसक्तिकरणका क्षेत्रमा हेफरको सहयोगमा नवलपरासी पूर्वमा विभिन्न परियोजना सञ्चालन गरिसकेको र अहिले पछिल्लो ४ वर्ष यता किसानहरुका लागि वित्तिय सेवामा पहुँच अभिवृद्धि गर्ने, सहकारी संस्था र नीजि प्राविधिहरुबाट प्राविधिक सेवाहरु उपलब्ध गराउन सहजीकरण गर्दै आईरहेको विमा लगायतका अन्य सेवाहरुमा सहजीकरण गर्दै आईरहेको बताउनुभयो । उहाँले उत्पादनको सामूहिक संस्थागत बजारीकरणमा टेवा पुर्याउदै बजारमा रहेको बिचौलियाको अस्वस्थ प्रतिस्पर्धाबाट मुक्त गर्ने क्षेत्रमा काम गर्दै आईरहेको र सोही सन्दर्भमा नवलपरासी पूर्वका ग्रामिण महिला किसानहरुको डिजिटल कृषि प्रविधिमा पहुँच अभिवृद्धि गर्नका लागि आँफुहरुले यो परियोजना शुरु गरेको कँडेलले वताउनु भयो ।

संयोजक कँडेल ले यस परियोजना अन्तर्गत नवलपरासी (ब.सु.पू)जिल्लाका ४ वटा पालिकामा कम्तिमा २५ वटा ई–चौतारी स्थापना गरिने, कम्तीमा ३० देखी ५० जना सम्म स्वयंसेवक सहजकर्ता परिचालन गरिने र यस परियोजनाको अन्त्य सम्म नवलपरासीका कम्तीमा पनि १०,००० (दश हजार) ग्रामिण महिला किसानमा यसको पहुँच पुर्याउने लक्ष्य रहेको वताउनु भएको छ ।