त्रिवेणीमा निर्माणधीन झोलुङ्गे पुलले पूर्णता पाउन अझै समय लाग्ने

कावासोती ।  त्रिवेणी स्थीत नारायणी नदीमा निर्माणाधीन झोलुङ्गे पुलको कामले पूर्णता पाउन अझै समय लाग्ने भएको छ ।
पूर्वी नवलपरासीको बिनयी त्रिवेणी गाउँपालिका ६ र पारी चितवनको माडी नगरपालिका वडा नं १ जोड्ने नारायणी नदीमा निर्माण थालिएको झोलुङ्गे पुलको काम विभिन्न कारणले पटक पटक प्रभावित बन्दै आएको छ ।
चितवन राष्ट्रिय निकुञ्ज र मध्यवर्ती क्षेत्र पर्ने भएकाले यहाँ झोलुङ्गे पुल बनाउने काम पटक – पटक रोकिदै आएको थियो । कहिले निकुञ्ज प्रशासन त कहिले वन विभागबाट काम रोकिदा विगत ६ वर्ष अघिदेखि सुरु गरिएको झोलुङ्गे पुल निर्माणको काम पटक – पटक समय थप गर्दा पनि अझै सम्पन्न हुन सकेको छैन् । वातावरणीय प्रभाव मुल्याङ्कन गरेर स्वीकृत भएपछि दुई वर्ष अघिबाट फेरी सुरु गरिएको पुलको काम गत जेठमा नै सम्पन्न गर्नुपर्ने भए पनि कोभिडका कारण काम प्रभावित बन्यो । कोभिड संक्रमणकै बीचमा स्वास्थ्य मापदण्ड पालना गर्दै काम भएको भए पनि वर्षाका कारण नदीमा पानीको बहाव बढ्दा काम रोकियो । वर्षा कम भए गत साउन महिनामा नै निर्माण पुरा गर्ने निर्माण व्यवसायीले जनाएको थियो तर , यस वर्ष वर्षा धेरै हुँदा काम पुरा हुन सकेन । असोजसम्म वर्षा भएकाले काम प्रभावित बनेको पुलका सब कन्ट्याक्टर तारा प्रसाद पौडेले जानकारी दिनुभयो । कात्तिक महिनामा चाडपर्व परेकाले कामदार नहुँदा काम ठप्प भएको उहाँले बताउनुभयो । पौडेलका अनुसार केहि तिनदिनअगिबाट कामदार काममा फर्किएका छन् । अब भने डेढ महिनाभित्र पुलमा मानिषहरु आवतजावत गर्न मिल्नेसम्म बन्ने उहाँले बताउनुभयो । पुलको सबै काम पुरा हुन भने अझै छसात महिना लाग्ने उहाँको भनाई छ ।
झोलुङ्गे पुल मार्फत् सडक सञ्जालसंग जोडेर बाल्मिकी आश्रमको विकास र पर्यटकको आगमनमा बृद्धि गर्ने उदेश्यले नारायणी नदीमा निर्माण थालिएको झोलुङ्गे पुलको सिभिलको काम सम्पन्न भएको छ । नदी वारीपारी लठ्ठा तान्ने टावर निर्माण (वेस) को काम सम्पन्न भएको छ । अब लठठ तान्ने , लठ्ठाको स्याक मिलाउने र लिक हाल्ने काम बाँकी रहेको पौडेले जानकारी दिनुभयो । पौडेलका अनुसार लठठ उपलब्ध गराउने जिम्मेवारी सरकारको भएकाले केही ढिला हुँदा पुलको काम सम्झौताको समयभित्र सपन्न गर्न ढिलाई भएको हो । गत चैत महिनामै लठठ उपलब्ध भएको भए गत जेठ महिनामै काम सकेर हस्तान्तरण समेत गरिसकिने थियो । तर लठठ नै ढिला उपलब्ध हुँदा पुलको काम समयभित्र सम्पन्न गर्न नसकेको पौडेलको भनाई छ ।
करीब ५३५ मिटर लम्बाईको यस झोलुङ्गे पुल तीनवटा ज्वाईन्ट भेन्चर कम्पनी रुबिना–मना जेबि कन्ट्रक्सनले दुई वर्ष अघि निर्माणको जिम्मा पाएका थिए । करीब ६ करोडको लागतमा पुल निर्माण सम्पन्न गर्ने सम्झौता भएको हो ।
धार्मिक तथा पौराणिक स्थल बाल्मिकी आश्रम पुग्नका लागि अहिले भारतीय भारतीय भू–भाग हुँदै पुग्नुपर्ने बाध्यता बाध्यता छ । नारायणी नदीमा झोलुङ्गे पुल निर्माण भएपछि भने, यो बाध्यता हट्ने छ । चितवनको माडी नगरपालिका वडा नं. १ मा पर्ने भए पनि बाल्मिकी आश्रम पुग्न पूर्वी नवलपरासीको त्रिवेणी हुँदै भारतीय बाटो प्रयोग गरेर पुग्नुपर्ने बाध्यता छ । चितवनबाट सडक सञ्जालले जोड्न समेत नसकिने अवस्था छ भने , नेपालको बाटो हुँदै पुग्न नारायणी नदीमा ढुङ्गाबाट पार गर्नुपर्छ । ढुङ्गाबाट जोखिम हुने र पारी जंगलको बाटो हिडेर जानुपर्ने, सवारी नजाने हुँदा नेपालीहरुले भारतकै बाटो प्रयोग गरेर आश्रम पुग्ने गरेका छन् । नेपालीहरुले भारतको बाटो प्रयोग गर्दा भारतीय प्रहरी र सेनाको ज्यादती सहनुपर्ने , धेरै दुःख दिने गर्दा एकपटक पुगेपछि झट्ट अर्कोपटक त्यहाँ नेपाली पुग्दैनन् । धार्मिक पर्यटकको आगमनमा बृद्धि गरेर आश्रमको विकास सम्भव भए पनि बाटोको पहँुच नभएकै कारण बाल्मिकी आश्रम ओझेलमा पर्दै आएको छ ।
भगवान रामसितासंग जोडिएको बाल्मिकी आश्रम धार्मिक तथा पौराणीक महत्व बोकेको क्षेत्र हो । सीताले लामो समय विताएको , सीता पाताल प्रवेश गरेको , लव–कुश जन्मेको जन्मथलो र रामायण काव्यको रचना भएको स्थल, बाल्मीकि आश्रम सहज रुपमा पुग्न नसकिने भएकै कारण ओझेलमा परेको हो ।