कावासोती –२ को वडा कार्यालय भवन शिलान्यास

कावासोती । कावासोती नगरपालिका वडा नम्बर २ को वडा कार्यालय भवनको शिलान्यास गरिएको छ । सिमलघारी प्रगति टोलमा वडा कार्यालय भवनको शिलान्यास गरिएको हो ।
भवन शिलान्यास कार्यक्रममा बोल्दै प्रमुख अतिथि कावासोती नगरपालिका प्रमुख चन्द्र कुमारी पुनले आफ्नो कार्यकालमा सबै वडामा वडा कार्यालयको भवन निर्माण गरि सहज रुपमा सेवा प्रवाह गराउन नगरपालिका लागि परेको बताउनुभयो । निर्वाचन पछि साविकका गाविस भवन भएका वडा बाहेक सबै वडा भाडाको घरबाट सञ्चालन गर्नुपरेको स्मरण गर्दै अब चाडै नगरका सबै वडामा आफ्नै कार्यालय भवन बन्ने बताउनुभयो । यसले व्यवस्थित रुपमा सहज तरिकाले सेवा प्रवाहमा सहयोग पुग्ने उहाँले बताउनुभयो ।
कार्यक्रममा बोल्दै बन्यजन्तुको कारण हुने जनधनको क्षति रोक्न कावासोती ११ देखी १७ सम्म मध्यवर्ती क्षेत्रमा १९ किलोमिटरमा पक्की पर्खाल सहित मेस जाली लगाउने काम यस वर्ष सकिने बताउनुभयो । यसले सो क्षेत्रका जनतालाई केही भएपनि राहत पुगेको प्रमुख पुनले बताउनुभयो ।

फोहर व्यवस्थापनको समस्या ठूलो समस्याका रुपमा रहेको बताउँदै सो समस्या हाल समाधान भएको भन्दै उहाँले फोहर व्यवस्थापनलाई अझै व्यवस्थित बनाउ सबै नागरिक सचेत बनि फोहरको वर्गीकरण गरिदिन आग्रह समेत गर्नुभयो ।
केरुङ्गे खोला तटबन्धन र बजार क्षेत्रमा व्यवस्थित रुपमा ढल व्यवस्थापन गर्नुपर्ने आवश्यकता रहेको बताउँदै यसकालागि सबैले पहल गर्नुपर्नेमा जोड दिनुभयो । नगर स्तरबाट यसकालागि योजना बनाएर काम गरिने समेत उहाँले बताउनुभयो । उहाँले वडा कार्यालय भवन निर्माणका लागि जग्गा दिनुहुने दाताहरूलाई धन्यवाद दिनुभयो ।

उप प्रमुख पे्रम शंकर मर्दनिया थारुले नगरपालिकाले सबै वडा कार्यालय व्यवस्थापन सँगै आधारभुत स्वास्थ्य सेवा समेत वडा वडामा पुर्याएको बताउनुभयो । शिक्षाको गुणस्तर वृद्धिमा अन्य संस्थासँग समन्वय गरि शिक्षकहरूको क्षमता विकासको काम गरिरहेको साथै सामुदायिक विद्यालयमा अगे्रजी माध्यममा पढ्ने बिद्यार्थीहरुलाई यसवर्ष देखी निशुल्क पुस्तकका लागि बजेट विनियोजन गरको बताउनुभयो । समग्रमा सडक पूर्वाधार  निर्माण देखी शिक्षा, स्वास्थ्य, कृषि लगायतका क्षेत्रको विकासमा नगरपालिकाले काम गरिरहेको बताउनुभयो ।

कावासोती नगरपालिका वडा नम्बर २ को भवन निर्माणका लागि स्थानीय टेक नाथ चापागाईँ, चोलाकान्त दुवे -पोखरेल- , झविलाल दुवे -पोखरेल-ले दुइ कठ्ठा जग्गा दान गर्नुभएको हो । बाटो सहित साढे तीन कठ्ठा जग्गा उहाँहरूले प्रदान गरेपछि सोही जग्गामा वडा कार्यालयको भवन निर्माण गर्न लागिएको हो ।

वडा कार्यालय भवनको शिलान्यास कार्यक्रममा बोल्दै वडा अध्यक्ष लक्ष्मी प्रसाद पौडेलले वडा कार्यालयको भवन निर्माणको लागि जग्गा व्यवस्थापनका लागि पहिले देखीनै पहल गर्दै आएको भएपनि सबैलाई पायक पर्ने जग्गा नहुँदा भवन निर्माण गर्न नसकिएको सिमलघारीमा भवन निर्माणकालागि जग्गा प्राप्त भएकोमा चाँडै व्यवस्थित वडा कार्यालयको भवन निर्माण हुने बताउनुभयो । उहाँले वडा कार्यालयको भवन निर्माणकालागि जग्गा प्रदान गर्नुहुने दाता र यस कार्यमा भूमिका खेल्ने सबैमा धन्यवाद प्रकट गर्नुभयो । सबैको साथ सहयोगले वडाको विकासले गति लिने भन्दै आगामि दिनमा समेत विकास निर्माणका कार्यमा सुझाव र सहकार्य गरिदिन सबैमा अनुरोध गर्नुभयो । सोही क्रममा उहाँले उज्यालो वडा बनाउन टोल टोलमा बत्ति राख्ने काम वडाबाट हुदैँ आएको बताउनुभयो । साथै बालमैत्री वडा निर्माणको लागि समेत आफुहरु लागेको भन्दै सबैले यसका लागि सहयोग गरिदिन उहाँले आग्रह गर्नुभयो । वडा कार्यालय शिलान्यास कार्याक्रममा स्थानीय बिभिन्न समूहका पदाधिकारी, सदस्य लगायतको उपस्थिती रहेको थियो । वडा कार्यालय बन्ने भएपछि व्यस्थित हुने र सेवा लिन थप सुविधा हुनेभएपछि स्थानीय समेत खुसी भएका छन् ।