६६ औँ प्रहरी दिवस : शान्ति ,सुव्यवस्था कायम गर्न प्रहरी कटिबद्ध छ

कावासोती । ६६ औँ प्रहरी दिवस नवलपुरमा मनाइएको छ । जिल्ला प्रहरी कार्यालय नवलपरासी पूर्व नवलपुरको कार्यालय परिसरमा भएको कार्यक्रममा बोल्दै कार्यक्रमका प्रमुख अतिथि प्रमुख जिल्ला अधिकारी मनमाया पँगेनीले जनताका हरेक गुनासो पहिलो पटक प्रहरी समक्ष आएर ठोक्किने हुँदा ति गुनासोहरूलाई उपयुक्त रुपमा समाधानको काम गर्नुपर्ने बताउनुभयो । प्रहरीले गरेका कामका आधारमा राज्य प्रतिको धारणा रहने हँदा यसलाई प्रभावकारी र व्यवसायिक बनाउँदै जानुपर्ने उहाँले बताउनुभयो । अहिले प्रहरी जनताको साथी बन्दै गएको भन्दै उहाँले सके सम्म जनताको गुनासो नआउने गरि काम गर्न , सके सम्म अभाव ,दबाब र प्रभावबाट बाहिर रहेर सेवा दिन सक्नुपर्ने बताउनुभयो ।
नवलपुरमा शान्ति ,सुव्यवस्था कायम गर्न प्रहरी संगठन प्रभावकारी रुपमा लागेको बताउँदै प्रमुख जिल्ला अधिकारी पँगेनीले अझै पनि केही ग्याप रहेको हुँदा ति ग्यापहरु मेट्ने गरि लाग्नुपर्ने बताउनुभयो ।
प्रहरी गाउँ गाउँ पुगी समुदाय सँग अझै घुलमिल हुन आवश्यक रहेको उहाँले बताउनुभयो । जिल्लाको पहाडी क्षेत्रमा कुनै घटना घटे प्रहरी पुग्न घण्टौँ लाग्ने अवस्था रहेकोले त्यस्तो ठाउँमा प्रहरीको पुर्न संगठन गर्न र पहुँच बढाउन आवश्यक रहेको उहाँले बताउनुभयो । त्सका लागि केही पहल भएको बताउँदै सरकारले त्यसको सम्बोधन गर्दै जानेमा उहाँले विश्वास व्यक्त गर्नुभयो ।
जनता प्रहरीको साथी भएकाले कुनै अपराध हुन लागे तत्काल सूचना दिन समेत उहाँले सबैमा अनुरोध गर्नुभयो । कार्यक्रममा बोल्दै प्रमुख जिल्ला अधिकारी पँगेनीले प्रहरीको संगठन अझै व्यवसायीक, अझै सक्षम , अझै सशक्तीकरण हुँदै जाओस भन्दै शुभकामना समेत प्रकट गर्नुभयो । कँही कतैबाट प्रहरीमाथि प्रश्न नआओस् र जनताको साथी भएर जनताको मनभित्र रहेर काम गरोस् भन्दै उहाँले दिवसको अवसरमा शुभकामना व्यक्त गर्नुभयो ।
कार्यक्रममा बोल्दै पूर्व प्रहरीका तर्फबाट संघका जिल्ला अध्यक्ष अमर बहादुर बिकले समाजमा हुने अपराधको न्यूनिकरणका लागि प्रहरी र पूर्व प्रहरी बिच सहकार्य आवश्यक रहेको बताउनुभयो ।
यस्तै पत्रकार महासंघ गण्डकी प्रदेश अध्यक्ष नारायण शर्माले पत्रकारका लागि धेरै जसाे सूचना  श्रोत प्रहरी भएको बताउँदै प्रहरी र पत्रकारबीचको समन्वय सधैँ आवश्यक रहेको बताउनुभयो ।
जिल्ला अध्यक्ष विरेन्द्र पराजुलीले नागरिक बिना बर्दीका प्रहरी भएकाले नागरिक र प्रहरी दुवैको सहकार्यले शान्ति सुरक्षा कायम गर्न सहयोग पुग्ने बताउनुभयो ।
प्रहरी दिवसको अवसरमा भएको कार्यक्रममा उत्कृष्ट प्रहरी सहित विभिन्न खेलकुद प्रतियोगितामा विजेता बनेका प्रहरीहरूलाई पुरस्कृत र सम्मानित गरिएको थियो ।
कार्यक्रमका अध्यक्ष एवं जिल्ला प्रहरी कार्यालय नवलपरासी पूर्वका प्रहरी नायब उपरीक्षक दिलिप कुमार गिरीले जिल्लामा शान्ति सुरक्षा कायम गर्न प्रहरी संगठन प्रतिवद्ध रहेको बताउनुभयो । प्रहरी सङ्गठनलाई चुस्त र व्यावसायिक बनाउँदै सेवा दिन संगठन प्रतिवद्ध रहेको बताउनुभयो ।