कावासोती । ३१ औं अन्तराष्ट्रिय ज्येष्ठ नागरिक दिवसको अवसरमा कावासोतीमा निशुल्क स्वास्थ्य परिक्षण र सम्मान कार्यक्रम गरिएको छ । कावासोती नगरपालिकाको संयोजन तथा ज्येष्ठ नागरिक नगर संघ कावासोतीको आयोजनामा भएको कार्यक्रममा ज्येष्ठ नागरिकको निशुल्क स्वास्थ्य परिक्षण सहित निशुल्क औषधि समेत प्रदान गरिएको थियो । कार्यक्रममा ज्येष्ठ नागरिकहरूलाई सम्मान समेत गरिएको थियो । करिब एक सय ज्येष्ठ नागरिकलाई निशुल्क स्वास्थ्य परिक्षण र दोसल्ला ओढाएर सम्मान गरिएको थियो ।
कावासोती नगरपालिका भित्रका ज्येष्ठ नागरिकको स्वास्थ्य परिक्षण र सम्मान गरिएको हो । ज्येष्ठ नागरिक नगर संघ कावासोतीका अध्यक्ष रमेश कुमार पौडेलको अध्यक्षतामा भएको कार्यक्रम कावासोती नगरपालिका आर्थिक समतिका संयोजक एवं वडा नम्बर दुईका वडा अध्यक्ष लक्ष्मि प्रसाद पौडेलेको प्रमुख आतिथ्यता रहेको थियो ।
कार्यक्रममा बोल्दै प्रमुख अतिथि वडा अध्यक्ष पौडेलले ज्येष्ठ नागरिकका सवालमा काम गर्न अक्षय कोष स्थापना गरेर अगाडि बढ्नुपर्ने । बताउनु भयो । नगर स्तरमा कोष खडा गरे आगामी दिनमा ज्येष्ठ नागरिकका सवालमा बिभिन्न कार्यक्रम गर्न सहज हुने उहाँले बताउनुभएको थियो । कावासोती नगरपालिकाले ज्येष्ठ नागरिक आश्रय स्थल बनाउने योजना गरेकाले जग्गाको खोजी गर्न सके भवन निर्माणको काम समेत गर्न सकिने उहाँले बताउनुभयो । यस्तै ज्येष्ठ नागरिकलाई जुन परिवारले धेरै माया ,ममता देखाएर स्याहार गरेको छ ,यातना दिने काम गरेको छैन सोही आधारमा उक्त परिवारका सदस्यलाई सम्मान गर्ने कार्यक्रम गर्नुपर्ने उहाँले बताउनुभयो । यसले जेष्ठ नागरिकलाई सम्मान गर्नुपर्छ भन्ने सकारात्मक सन्देश जाने बताउँदै यसका लागि सम्बन्धित निकायले बेलाबेलामा अनुगमन गर्न सक्ने वडा अध्यक्ष पौडेलले बताउनुभयो । प्रत्यक वडामा कुन उमेर समूहका कति ज्येष्ठ नागरिक रहेका छन् भनेर अभिलेख राख्ने र आगामी दिनमा यस्ता कार्यक्रमलाई थप व्यवस्थित बनाउँदै ९० वर्ष भन्दा माथि नागरिकलाई घरमै पुगेर सम्मान गर्नुपर्ने बताउनुभयो ।
कार्यक्रममा कावासोती नगरपालिका प्रमुख प्रशासकीय अधिकृत रमेश घर्तीले नगर स्तरबाट ज्येष्ठ नागरिकलाई सम्मान गर्ने खालका कार्यक्रम र योजना बनाउने काम निरन्तर गर्ने बताउँदै दिवसको अवसरमा शुभकामना प्रकट गर्नुभएको थियो ।
स्वास्थ्य शाखा प्रमुख कृष्ण नागिला, शिक्षा शाखा अधिकृत राजन पाण्डे, वडा नम्बर ६ का वडा अध्यक्ष हेम प्रसाद पाण्डे, १० का वडा अध्यक्ष टेक बहादुर महतो, १७ का वडा अध्यक्ष छविलाल महतो लगायत बिभिन्न वडा जनप्रतिनिधि, कावासोती खानेपानी तथा सरसफाइ उपभोक्ता संस्थाका अध्यक्ष भिमलाल कँडेल लगायत बिभिन्न व्यक्तिहरूको सहभागिता रहेको थियो ।
कार्यक्रममा बोल्ने अन्य वक्ताहरूले ज्येष्ठ नागरिकको सदैव सम्मान गर्नुपर्ने बताएका थिए । राज्यले ज्येष्ठ नागरिकको सम्मानमा विभिन्न कार्य गरेको भन्दै थप ज्येष्ठ नागरिकका सवालमा थप काम गर्नुपर्ने धारणा राखेका थिए । ज्येष्ठ नागरिकलाई परिवार ,समाज र राज्यले सम्मानको व्यवहार सँधै गर्नुपर्ने बताएका थिए । कार्यक्रममा उपाध्यक्ष सिर्जना कँडेलले स्वागत मन्तव्य राख्नुभएको थियो भने कार्यक्रमको संचालन श्यामसुन्दर भण्डारीले गर्नुभएको थियो ।
