कावासोती । खाद्य सामाग्रीका ठूला सप्लायर्सले म्याद नाघेका र लेबल नभएका सामाग्रीलाई ग्रामीण क्षेत्रमा सप्लाइ गर्ने गरेको पाइएको छ । चाडपर्वलाई लक्षित गर्दै घरेलु तथा साना उद्योग कार्यालय पूर्वी नवलपरासीले जिल्लाको ग्रामीण क्षेत्रमा गरेको अनुगमनका क्रममा यस्तो पाइएको हो ।
घरेलु तथा साना उद्योग कार्यालयको अगुवाइमा विभिन्न सरोकारवाला निकायका प्रतिनिधि सहितको टोलीले कावासोती १७ को गोछडाटारमा गरिएको अनुगमनका क्रममा खुद्रा पसल सञ्चालकहरूले सप्लायर्सले नै त्यस्ता सामाग्री दिने गरेको गुनासो व्यक्त गरेका छन् । अनुगमन टोलीले गोछडाटारको करिब १० वटा खाद्य पसलमा अनुगमन गरेको थियो । अनुगमन गरिएका आधिकांश पसलबाट म्याद नाघेको , लेबल नभएको सामाग्री जफत गरिएको छ । भने , मूल्य सूची नटाँसेको पाइएको छ । सामाग्री जफत भएपछि पसल सञ्चालकले सप्लायर्सले सामाग्री दिँदा नै म्याद नाघेको सामाग्री दिएको गुनासो व्यक्त गर्नुभएको थियो ।
काफ्ले इन्टरप्राइजेजका अम्बिका काफ्ले जैशीले केही दिन अघि मात्रै राखेको सामान म्याद गुज्रेको नहुनुपर्ने भन्दै आफूहरूले राम्रोसँग हेरेर राख्न पनि नभ्याउने , गाडीबाट हतार हतार झारेर हिड्ने गर्दा पनि सामाग्री म्याद नाघेको बताउनुभयो । ‘हामिले विश्वास गरेर त्यति ख्याल गरेनौ , अस्ति मात्रै झारेको सामान हो , कसरी म्याद सकियो ? । ’ काफ्लेले भन्नुभयो ।
टोलीले खाद्य पसल बाहेकका अन्य हार्डवेयर , भाँडा पसल , टेलर , सैलुन लगायतका पसलमा समेत दर्ता भए नभएको अनुगमन गरिएको थियो । अनुगमन गरिएका आधिकांश पसल दर्ता तथा नवीकरण नभएको पाइएको घरेलु तथा साना उद्योग कार्यालयका प्रमुख सागर खनालले बताउनुभयो । ग्रामीण क्षेत्रमा म्याद गुज्रेको , अखाद्य वस्तु मिसावट भएको सामाग्री बढि बिक्री हुने गरेको गुनासो आउने गरेकाले यसपालि ग्रामीण भेगको अनुगमनलाई प्राथमिकतामा राखेको खनालले बताउनुभयो । ‘अनुगमनका क्रममा ठूला सप्लायर्सबाट नै अलि बठ्याइँ हुने गरेको पाइयो । पसल भर्खर खुलेको छ , छ महिला पनि पुगेको छैन् । तर , सामाग्री नौ महिना अघि नै म्याद सकिएको पाइएको छ । ठूला सप्लायर्सले ग्रामीण क्षेत्रमा ख्याल गर्दैनन् भन्ने बुझेर नै म्याद नाघेका , म्याद सकिन थोरै समय बाँकी रहेका , लेबल नभएका सामाग्री पढाउने गरेको पाइयो । ’ खनालले भन्नुभयो ।
दैनिक रुपमा प्रयोग हुने मरमसला , नास्ताका आइटम नै बढि म्याद नाघेको पाइएको खनालले जानकारी दिनुभयो । यस्तै बालबच्चाले बढि प्रयोग गर्ने मिठाईका आइटम पनि बढि म्यान नाघेको पाइएको छ । ‘हामिले दैनिक रुपमा साँझ बिहान तरकारीमा राखेर खाने मसलाजन्य सामाग्री नै बढि म्याद नाघेको पाइएको छ । यसले हाम्रो स्वास्थ्यलाई कति असर पार्ला , यसतर्फ उपभोक्ता पनि सचेत हुन जरुरी छ । उपभोक्ताले पनि म्यान नाघेको छ छैन हेर्ने , लेबल नभएका सामाग्री खरीद नगर्ने हो भने व्यवसायीले पनि सप्लायर्सलाई भन्छ । त्यसपछि सप्लायर्सले पनि यस्ता सामाग्री पठाउन डराउनुपर्छ । सप्लायर्सलाई मात्रै दोष दिएर खुद्रा सञ्चालक उम्कन पाइदैन् । ’ खनालले भन्नुभयो । यस्तै कावासोतीको डण्डा बजारमा गरिएको अनुगमनका क्रममा आधिकांश पसल स्थानीय तहमा दर्ता भएको तर , घरेलु कार्यालयमा दर्ता नभएको पाइएको कार्यालय प्रमुख खनालले बताउनुभयो । डण्डामा रहेको खाद्य पसल , कस्मेटिक पसललाई प्राथमिकतामा राखेर गरिएको अनुगमनका क्रममा कस्मेटिक पसलमा महिलाहरूले प्रयोग गर्ने , फेस क्रिम , तेल , पाउडर , प्रफिम जस्ता सामाग्री म्याद नाघेको लेबल नभएको , उत्पादन मिति भए पनि एक्पाएर हुने मिति नभएको सामाग्री जफत गरिएको छ ।
अनुगमनपछि पहिलो पटकलाई सम्झाई बुझाई गरेर मात्रै छाडिएको छ । भने, दर्ता , नवीकरण गर्न तुरुन्तै कार्यालयमा आउनलाई भनिएको छ । चाडपर्व मात्र नभई आउँदा दिनमा नियमित रुपमा बजार अनुगमन गर्ने समेत खनालले बताउनुभएको छ । बिहीबार गोछडाटार र शुक्रबार डण्डा बजार अनुगमन गरिएको हो ।
अनुगमनमा वडा सदस्य आनन्द श्रेष्ठ , जिल्ला प्रशासन कार्यालय , उपभोक्ता हित संरक्षण मञ्च , पत्रकार लगायतका प्रतिनीधिको सहभागिता रहको थियो ।
