कावासोती । नवलपुर फर्निचर उद्योग तथा फार्मेसिङ्ग व्यवसायी संघको आयोजनामा बिहीबार कावासोतीमा अन्तरकृया कार्यक्रम भएको छ ।
उद्योगी व्यवसायीको समस्या पहिचान गरेर समस्याको निकास निकाल्ने उदेश्यले कार्यक्रम आयोजना गरिएको हो । कार्यक्रममा जिल्लाभरिका करीब २५ जना फर्निचर तथा फर्निसिङ्ग व्यवसायीहरुको सहभागिता रहेको थियो । संघका सल्लाहाकार पुष्प पाण्डेले विषय प्रवेश गर्दै जानकारी गराउनुभएको थियो । उहाँले उद्योग स्थापना गर्न दुरी हटाउने , हालसम्म दर्ता तथा नविकरण भै काम गर्दै आएका १८÷२४÷३६ सबै वेन्सो हरुलाई चिरान गर्न अनुमती दिलाउने , मेसिनबाट घरघर डुली विना दर्ता काठ चिरान गर्ने काम रोक्नुपर्ने , वन समूहबाट उत्पादित वैद्य काठहरु सम्बन्धीत वडाका वेन्सोहरुले चिरान गर्न पाउनपर्ने , स– मिललाई मात्रै टेन्डर दिने, अन्य वेन्सोहरुलाई नदिने नियम हटाउनुपर्ने , कोभिडका कारण मर्कामा परेका र धरासायी बनेका उद्योगी व्यवसायीलाई ऋण मिनाहा तथा प्रोत्सहन लगायतका कार्यक्रम ल्याउनुपर्ने लगायतका विषयमा जानकारी गराउनुभएको थियो ।
यस्तै कार्यक्रममा बोल्ने अन्य व्यवसायीहरुले दोहोरो कर तिर्नुपर्दा मारमा परेको गुनासो गरेका थिए । घरेलु कार्यालय तथा स्थानीय तहमा समेत कर तिर्नुपर्ने तर, सेवा सुविधा खासै नहुने बताएका थिए । यस्तै विना दर्ता घरघर डुलेर काम गर्नेबाट कर तिरि , घरभाडा तिरेर व्यवसाय गरेकाहरु मारमा परेकाले त्यस्ता व्यवसायीलाई कि त करको दायरामा ल्याउनुपर्ने कि त काम गर्न दिन नहुने माग गरेका छन् । साना तथा मझौला खालका उद्योगी व्यवसायीहरुलाई ठूला उद्योगी व्यवसायीहरुको मिलेमतोमा नै धरासायी बनाउनतर्फ लागेको आरोप समेत लगाएका छन् । कोभिडको कारण व्यवसाय घाटामा जाँदा ऋण र ब्याज तिर्नका लागि फेरी ऋणै लिएर तिर्नुपर्ने अवस्था आएको समेत गुनासो गरेका थिए । यस्तै जिल्लामा उद्योग व्यवसाय सञ्चालन गर्न मिल्ने अधिकाशं क्षेत्र मध्यवर्ती क्षेत्रमा पर्दा समस्या भएको बताएका थिए ।
कार्यक्रममा व्यवसायीको गुनासोलाई सम्बोधन गर्दै डिभिजन वन कार्यालय नवलपुरका सहायक वन अधिकृत सरद कुमार अधिकारीले उद्योगीहरुले उठाएको समस्या जायज रहेको भन्दै उहाँले नीति नियमभन्दा बाहिर गएर आफूहरुले कुनै काम गर्न नसक्ने बताउनुभयो । कतिपय विषय नियतबश नै दबाबमा हुने र कतिपय विषय नीतिनियम बनाउनेले नबुझ्दा हुने गरेको भन्दै उहाँले उद्योगी व्यवसायीहरु एकजुट भएर माथीबाट नै नीतिनियम नै परिवर्तन गर्नतर्फ अग्रसर हुनुपर्नेमा जोड दिनुभयो । उहाँले नीतिनियममा भएको कुरालाई कुनै किसिमबाट रोकावट नहुने तर्क गर्दै उहाँले नियतवश कसैलाई पनि दुःख दिने काम डिभिजन वनबाट नभएको र आगामी दिनमा पनि नहुने बताउनुभयो ।
यस्तै कार्यक्रममा सम्बोधन गर्दै कार्यक्रमका प्रमुख अतिथी तथा घरेलु तथा साना उद्योग कार्यालय नवलपुरका प्रमुख सागर खनालले घरेलु कार्यालयबाट उद्योगीहरुको सहजताका लागि के गर्नुपर्छ त्यो गर्न तयार रहेको बताउनुभएको थियो । अन्तकृयामा उठेका कुरालाई सम्बन्धीत निकायमा तुरुन्तै पु¥याउने भन्दै उहाँले पहिलेको तुलनामा सरकार पनि उद्योगधन्दा सञ्चालनको सन्दर्भमा केही लचिलो बन्दै गएको तर्क गर्नुभयो । पहिले तिन किलोमिटर क्षेत्रमा हुनुपर्ने नियम अहिले एक किलोमिटरमा आएको जानकारी दिदै उहाँले राम्ररी कुरा बुझाउन सके सम्बन्धीत निकायले पनि बुझ्ने र ढिलो चाँडो समस्या समाधान उन्मुख हुने बताउनुभयो । उहाँले उद्योगी व्यवसायी पनि केही लचिलो भएर आफ्ना कुरा राख्न सके छिटो समाधान हुने बताउनुभयो ।
बाहिरबाट आएर घरघमा डुलेर काम गर्ने व्यवसायीको सन्दर्भमा सोधपुछ गरेर दर्ताको दायरामा ल्याउन पहल गर्ने बताउनुभयो ।
संघका जिल्ला अध्यक्ष लक्ष्मी प्रसाद भण्डारीको अध्यक्षतामा भएको कार्यक्रममा संघका सचिव ज्ञान प्रसाद डुम्रेले सहजीकरण गर्नुभएको थियो ।
