स्थानीय तहमा बेथिती : ऐन विपरित चाडपर्व खर्च, आफू खुसी स्वकीय सचिव र सल्लाहकार राखी तलब प्रदान

नवलपुर । स्थानीय तहहरूले कतिपय शीर्षकमा मनपरी रुपमा खर्च गरेको देखिएको छ । महालेखाको अन्ठाउन्नौं वार्षिक प्रतिवेदनमा चाडपर्व खर्चका नाममा पैसा लिने, ऐन विपरित पोशाक , भत्ता , स्वकीय सचिव तथा सल्लाहकार राखी तलब प्रदान गर्ने देखिएको उल्लेख गरेको छ ।

स्थानीय तहका पदाधिकारी तथा सदस्यहरूको सुविधा सम्बन्धी ऐन,२०७५ को दफा ३ मा स्थानीय तहका पदाधिकारी र सभाको सदस्यले आफ्नो पदको कारबाही सुरु गरेको मितिले  अनुसूची १ अनुसारको रकम मासिक सुविधा बापत पाउने व्यवस्था रहेको छ । तर स्थानीय तहहरूले ऐनमा व्यवस्था नभएको चाडपर्व खर्च ,पोशाक सुविधामा खर्च गरेको महालेखाले जनाएको छ । यस्तै ऐनमा व्यवस्था भए भन्दा विपरित सञ्चार ,अनुगमन, घरभाडा,यातायात इन्धन लगायतमा मनपरी खर्च भएको प्रतिवेदनले देखाएको छ । यसै गरि विभिन्न रुपमा मासिक सुविधाका रुपमा समेत करोडौं रकम लिने गरेको र यस्तो रकम असुल गर्नुपर्ने महालेखाले प्रतिवेदनमा उल्लेख गरेको छ ।

ऐनले तोके भन्दा फरक रुपमा मनोमानी रुपमा वैठक भत्ता वितरण हुने गरेको समेत प्रतिवेदनमा उल्लेख रहेको छ । साथै स्थानीय तहका पदाधिकारी  तथा सदस्यहरूको सुविधा सम्बन्धी ऐन, २०७५ मा पदाधिकारीहरूको लागि स्वकीय सचिव र सल्लाहकार राखी पारिश्रमिक दिने व्यवस्था छैन । तर स्थानीय तहहरूले स्वकीय सचिव र सल्लाहकार नियुक्त गरि ९ करोड बढी भुक्तानी गरेको महालेखाको प्रतिवेदनमा रहेको छ । महालेखा परीक्षकको कार्यालयले ऐनमा व्यवस्था नभएको सुविधा खर्च लेख्नु कानुन सम्मत नभएको उल्लेख गरेको छ ।